KHAWTHLIR

KTP-in thisen pe
KṬP, Thakthing Veng Branch chuan nimin khan an kohhran hall-ah thisen pek huaihawtin, Synod Hospital tan thisen unit 40 an pe a, petute mipa 29 leh hmeichhia 11 an ni.

Kawng thar hawng
Minister Lalrinawma chuan March 7, Thawhlehni khan a bial Tuikum huam chhunga Khawbél leh Rúllàm khaw inkalpawhna kawng laih thar a hawng. Kawng hi MLA fund hmanga laih a ni a, km. 13-a thui a ni. Lalrinawma chuan, mipuite'n eizawnna ngêl nghet an neih chu a ngaih pawimawh ber a nih ṭhin thu sawiin, "MLA fund pawh bial chhung khaw hrang hrangin a ṭangkai thei ang bera an chhawr theihna tur nia ka hriatah ka hmang ṭhin," a ti.

Minister-in hmanpui
Ex-Servicemen League Sub-Headquarters, Kolasib district chuan nimin khan Kolasib-a IPR conference hall-ah Assembly vawi 40-na an hmang a, minister K Lalrinliana, bialtu MLA-in a hmanpui. An member thite sûnna hun hman a nih bakah, kum 80 chung lam mi 25 chawimawina hlan a ni. Ex-Servicemen League hi kum 1977-ah din a ni a, Kolasib district-ah member 600 chuang an awm mek.

Corporator-in pe
AMC Ward-VIII corporator Christina Roluahpuii Sailo chuan property tax return aṭangin steel almirah eng emaw zat a lei a, an ward huam chhunga anganwadi centre-te hnenah nimin khan a hlan. Ward VIII-ah hian anganwadi centre pakua a awm a ni.

Women's Day
Champhai District Legal Services Authority (DLSA) huaihawtin nimin khan Champhai Tlangsamah International Women's Day hman a ni a; hmeichhiate'n in chhung khura hleihlenna an tawrh ṭhin tihtlem dan tur leh, mipa leh hmeichhe intluktlànna chungchang zirho a ni. Lawngtlaiah pawh ICDS District Programme Office, Child Development Project Office leh One Stop Centre huaihawtin CDPO pisaah Women's Day hman a ni bawk.