T Romana College SU-in Sit-in protest an nei dawn

T Romana College Students’ Union chuan, an zirtirtu pahnih sawn chhuah duh loh lantir nan vawiin hian New Capital Complex-ah lungawi lohna lantirin, sit-in protest huaihawt an tum a; an hmalakna thláwp turin mipui an ngen.

T Romana College SU chuan thuchhuah siamin, an college-a zirtirtu pahnih - Dr C Lalhmangaihzami, History department leh Catherine Fanai, English department-te chu hmun danga awm turin Mizoram sorkarin a sawn tih an tarlang a; "Sorkar hian min sawn chhuahsak lui emaw, an aiawh a rawn dah lêt hma chuan Secretariat, New Capital Complex-ah January 16, 2020 hian sit-in protest neiin kan dodal tlat dawn a ni," an ti.

T Romana College SU chuan, an zirtirtu pahnih sawn an nih avangin zirtirtu la awmte an indaih lo hle dawn tih an tarlang a; zirtirtu pahnihte awmna department - History leh English-ah tuna zirtirtu la awmte ringawt chuan syllabus an zawhpui hman dawn loa an hriat thu an sawi bawk.