LMC inthlanpuia candidate turte BJP, MNF leh ZPM-in an puang

BJP, MNF leh ZPM party-te chuan nimin khan March 29, 2023-a Lunglei Municipal Council (LMC) inthlanpuia an candidate turte an puang a, bial (ward) tinah candidate an dah vek dawn.

LMC inthlan turah hian ward no. 2, 5, 8 leh 10-te chu hmeichhe tana hauh a ni a; ward dang pasarih erawh chu general ward, mipa leh hmeichhiain an chuh theih ve ve a ni.

MNF

MNF party chuan nimin khan Saikuti Hall, Lungleiah an candidate turte puanna inkhawm an nei a, MNF Gen.Hqrs vice president Lalthlengliana'n an candidate turte a puang a; thu sawiin, LMC inthlanah party-te'n a mal ṭheuha an chuh dawn avangin ruling party candidate-te an tlin ngei a beisei thu leh ward tinah MNF candidate an ṭha ber nia an hriat thu a sawi.

Lalthlengliana chuan, Congress chu an hlauhthawn-awm loh thu leh ZPM chu a phawvuak chauha thâwm nei lian an nih thu a sawi a, "Kum 2023 hi Lunglei history-a dai tawh ngai lo tur, ṭhangtharte tan chhinchhiah tlak tak a ni dawn. Kan candidate mi ṭha tak takte hian kil tin aṭangin beihna in la tâwk dawn chauh a, zâm rêng rêng suh u," tiin an candidate-te a fuih.

MNF adviser Dr R Lalthang­liana, minister pawhin thu sawiin, LMC chu Lunglei khawpui tana rotling, malsawmna leh hma­sawn­na kengtu tur, ro phùm rûk hâi chhuahna tur a nih thu a sawi a; "MNF candidate-te hi Lunglei khawpui tana mi thiam leh ṭha thlan khawm, kohhran leh khawtlang tan pawha mi ṭangkai, party dang tana zàm phah rum rumna tur an ni," tiin, an candidate-te vote turin mipui a sawm.

ZPM

ZPM working president K Sapdanga pawhin nimin khan Lungleia ZPM Southern Headquarters pisaah LMC inthlana an candidate turte a puang a, ward 11-ah candidate an dah kim dawn.

ZPM candidate turte chu mipa paruk leh hmeichhia panga an ni a, hmeichhe tan bika seat hauh (reserved) bial pali-ahte bakah, general ward zinga Ward 1-ah candidate atan hmeichhia an dah dawn a ni.

ZPM Working President chuan, ram rorelnaah a hniam ber aṭanga a sang ber thlenga namen loa eirukna do tura an party mite chahin, "Eirukna hian ram a tichhia. Mi fel tak tura an ngaih, roreltu tura an thlan chhuahte hmingchhe van kaia an chhuah phahna a ni," a ti a; an party-in councillor tura a chhawp chhuahte chu eirukna lam hawi chi reng reng leh eirukna laka puh theih thil laka fihlim tura an duh thu a sawi.

K Sapdanga chuan moral reform an tuipui tih sawiin, "Siamṭhat ngai lai ber chu thatchhiatna a ni. Thatchhiatna tuhtu chiang tak chu a thlawna thil sem a ni. Vote zawnna atana pawisa sem hi rilru tihchhiatna zawng zawnga tichhe tu nasa ber a ni. Kan party chuan vote zawnna ang chiah a thlawn a thil sem reng reng ṭha kan ti lo," a ti.

BJP

BJP, Mizoram Pradesh vice pre­sident R Vanramchhuanga pawh­in LMC inthlanpuia BJP candi­date turte nimin khan a puang.

BJP chuan, "Kan candidate-te hi Lunglei khawpuiah sorkar ṭha leh lang­tlang a awm theihna atan min vote-pui turin thinlung leh tih tak zetin Lunglei mipui kan sáwm a, BJP an thlan tlin chuan a rang thei angin Union Housing and Urban Affairs minister Pu Hardeep Singh Puri chu Lungleiah chah chhuakin, Lunglei khawpui ngeiah Lunglei mipui mamawh chu LMC member-te'n in thlen thei ang tih kan tiam a ni," an ti a; rilru fím taka Lunglei khawpui enkawltu turte thlang turin mipui an ngen.

BJP tarlan danin, LMC inthlan atan hian BJP, Mizoram Pradesh chuan LMC candidate zawng turin Search Committee an din a, Lungleiah kalin, an candidate turte an zawng a ni. Candidate tura an thlante chu Mizoram BJP president Vanlalhmuaka hoa pawm a nih hnuah BJP national president JP Nadda pawmpui turin nimin khan an thawn a, a pawmpui hnuah nimin vek khan candidate turte chu an puang a ni.