Lengpui Airport chei ṭhatna atan Cheng nuai 6,083 sên a ni tawh
Mizoram sorkar chuan Public Works Department (PWD) aṭangin Lengpui Airport chei ṭhatna atan sorkar term kal mek chhungin cheng nuai 6,083.48 a hmang tawh.
Vanglaini-in document a neiha a lan danin, Lengpui Airport chei ṭhatna atan hian civil work 10 leh electrical work paruk thawh a ni a; civil work-ah hian cheng nuai 5,420.57 leh electrical work-ah hian nuai 662.91 hman tawh niin, a vaia hman tawh zat chu cheng nuai 6083.48 a ni.
Civil work 10 zinga pariat chu thawh zawh a ni tawh a; a dang pahnih - Zoramchhana, Electric Veng thawh cheng nuai 2,123.74 man leh Kamlova Chhangte, Ṭhuampui thawh cheng nuai 1,959 mante chu thawh mek (on-going work) a ni thung.
Zoramchhana hian cheng nuai 2,123.74 man, 'Improvement/upgradation of operational/non-operational facilities of Lengpui Airport (SH: renovation of terminal building) (SCA/SASCE)' siam hna a thawk a; chuta tan chuan cheng nuai 2,123.74 pek tawh niin, cheng nuai 1,253.02 a hmang tawh.
Kamlova Chhangte (Kamrul tia hriat bawk) firm KR Construction chuan cheng nuai 1,959 man 'Improvement/upgradation of operational/non-operational facilities of Lengpui Airport (SH: elevated road with connected components of terminal building) (NESIDS) hna a thawk a, chuta tan chuan cheng nuai 783.60 pek tawh niin, a hmang zo tawh a ni.
Electrical work chu North Eastern Sales Corporation, Chaltlang, KR Construction leh RR Enterprises, Karol Bagh, Delhi-te'n an thawk. Firm parukte hian hna paruk atana sum ruahman cheng nuai 866.73 aṭangin nuai 662.91 man an thawk zo tawh a ni.
