BCM Assembly vawi 127-na neih mek a ni

Baptist Church of Mizoram (BCM) rorelna sang ber Assembly vawi 127-na chu March 8, Nilaini zan khan Lunglei Salem Veng BCM biak-inah ṭan a ni a, thupui chu 'Ram chu Lalpa ta a ni' tih niin, March 12, Pathianni zanah a ṭiak ang.

Nimina BCM Assembly-ah hian chawhmaa rorel ṭan hmain president kal chhuak Rev. Dr R Zolawma’n president thar Rev. KV Thanga hnenah president nihna a hlàn a, Rev. KV Thanga kaihhruaiin rorel a ni. Nikum Assembly leh kumin Assembly inkara pastor thi pakhat leh kohhran upa thi mi 84-te sûnna hun neih a ni a; kum 2024 Assembly-a president atan Rev. F Ramdinmawia thlan a ni.

Nimina rorel zingah, Zomi Baptist Churches of America nen thawhhona neih te, Chin Baptist Association of North America nena thawhho dilte a tel. Inkhawmpuiah hian Pathianni chawhmaah pastor tharte nemngheh a ni ang a, chawhnuah Lalpa Zanriah kilho a ni ang.

Inkhawmpuiah hian palai thei tura inhriattir mi 1,621 aṭangin nimin chawhnu lam thleng khan palai 1,316 an thleng tawh a, kohhran páwl dang leh ram dang aṭanga palai (fraternal delegate) mi 20 an awm bawk.

BCM report-a a lan danin, BCM-ah hian tualchhung kohhran 680 awmin, member 1,76,404 an awm a, mission field hrang hrang­ah missionary 1,300 an nei mek.

Financial year kal mekah April 2022 - February 2023 chhungin Rs 76,02,31,059 an hmu a, thla khat la awm mahse financial year 2022-23 atana hmuh an tum (target) chu Rs 3,65,80,476-in an khûm tawh.

Kum 2023-24 budget atan cheng nuai 12,642 an ruahman a, hei hi tun ṭum inkhawmpuiin a pawmpui a ngai dawn a ni.