LGBTQI shelter sak tumna a awm zui lo, sum dah sa thil dangah hman tum a ni

UDPA department-in Sakawrtuichhun, Aizawla LBGTQI (lesbian, gay, bisexual, transgender, queer, intersex)-te tana in (shelter) sak a tum chu sorkar thu anga sût a nih hnuah a sakna tur sum chu thil dang (shelter dang) sakna atan hman tum a ni.

RTI Act hmanga zawhna UDPA depart­ment-in February 16, 2023-a an chhan danin, LGBTQI shelter sakna tura sum ruahman chu sorkar laipuia Ministry of Housing & Urban Affairs (MoHUA) hnuaia Deendayal Antyodaya Yojona -National Urban Livelihoods Mission (DAY-NULM) scheme aṭanga dawn a ni.

LGBTQI shelter sak tum ṭhulh a nih chhan zawhna chhángin UDPA State Public Information Officer (SPIO) chuan, "State sorkarin cancel tura Directorate of UDPA a hriattir anga cancel a ni," a ti a; LGBTQI tana in (shelter) sak tum chu ṭhulh hlen a nih thu a tarlang.

UDPA SPIO chuan, LGBTQI shelter sakna tura sum ruahman chu hmun dangah hman tum a nih leh nih loh zawhna chhangin, "LGBTQI community aṭanga harsatna tâwkte chawlhbûk tur shelter sak tumna hi DAY-NULM scheme hnuaia component pakhat Scheme of Shelter for Urban Homeless (SUH) fund huang chhunga mi a ni. Shelter dang sak nan hman theih niin, shelter dang sakna turin hmalak tum mek a ni," a ti.

LGBTQI-te tan UDPA department-in tun hmain hmalakna a la neih ngai loh thu tarlangin SPIO chuan, "Tun dinhmunah UDPA department-in hmalak tumna a nei lo," a ti a; tun hnu zelah LGBTQI tana hmalakna an neih dawn leh dawn loh zawhna chhangin, DAY-NULM chu central scheme a nih avangin hun lo la awm tura MoHUA thuchhuah dan tur hriat theih a nih loh thu a tarlang bawk.

'Construction of LGBTQI Shelter at Sakawrtuichhun, Aizawl' atan hian UDPA department chuan December 6, 2022 khan tender an chhuah a, Sakawrtuichhunah Rs 35,00,000 hmangin in sak tum a ni.

Hetih lai hian, LGBTQI tana in sakna atana sum hman tumna scheme nia tarlan, DAY-NULM hnuaiah MoHUA-in sum a pek chhuahna 'SPARK ranking under the category of NER & Himalayan states' lehkhaah chuan LGBTQI shelter sakna tur bik sum ruahman tarlan a ni lo.

Second award in SPARK ranking under the category of NER & Himalayan states for the year 2019-20 under DAY-NULM tihah MoHUA chuan February 25, 2021 khan Mizoram sorkarah sum (grants-in-aid) Rs 67,50,000 a pe a, February 25, 2021-ah vek hian 2nd award in SPARK ranking under the category of NER & Himalayan states for the year 2019-20 tihah Rs 2,19,60,000 a pe bawk.

Tarlan tawh angin UDPA department in LGBTQI-te tan Sakawrtuichhunah in sak a tum hi Central YMA chuan an duh lo a, December 12, 2022 khan chief minister Zoramthanga hmuin an thlen a; tlai lamah LGBTQI shelter sak tum chu sût a ni.