Governor hoin TB natna sawiho a ni

Governor Hari Babu Kambhampati leh sorkar laipuia Health & Family Welfare ministry hnuaia Central TB Division (CTD) national consultant D Dharma Rao chu nimin khan Raj Bhavan-ah an inkâwm a; Mizoramah ngawr (tuberculosis) vei enkawl mek 1,321 zinga mi 989 chu chawṭha leina tur ṭanpuina mamawh an nih thu tarlan a ni.

Governor chuan, TB Patient Nutritional Support atana sum thawhtute chungah lawmthu sawiin, "Mizoram chu kan la vannei a, TB vei pawh mi 1,000 chuang vel chiah kan la nih avangin ṭan kan lak chuan TB vei ei leh in ṭha mamawhtu zawng zawng kan puih vek theih a rinawm," a ti.

Larsap chuan, MLA te, mipui aiawh thlan tlin te, college hnathawk leh sorkar hnathawk dangte chu TB veite tana rawngbawlna huangah lut zel turin a ngen a; kohhran hruaitute leh tlawmngai pawlte phungbawmna sáwm turin State TB Cell hotute a chah bawk.

Inkawmnaa tarlan danin, Mizoramah TB vei mek mi 1,321 an awm a, chu'ng zinga mi 989 chuan chaw ṭha leina tur ṭanpuina an mamawh. Nimin thlenga TB natna veite ṭanpuina atan Nikhshay Mitra kaltlangin sum thawhtu mi 400 an awm. Chaw ṭha leina tur thawh duh chuan damlo pakhat tan thla khatah Rs 650 thawh theih a ni.