KHAWTHLIR

Minister inkâwm
Environment, Forest & Climate Change (EFCC) minister TJ Lalnuntluanga chuan nimin khan New Delhi-ah sorkar laipuia EFCC minister Bhupender Yadav chu a pisaah a kâwm a; Mizoram EFCC department-in hmasawnna tura sorkar laipuia dilna hrang hrang a thehluhte a sawipui. Bhupender Yadav chuan, a theih anga hma a lak tur thu leh, financial year thara kalpui theih tura bawhzui an tum thu a lo hrilh. EFCC Minister hi PCCF RK Singh-in a ṭawiawm.

Ei tur sem
Nimin March 9 kha World Kidney Day a ni a, he ni pual hian Mizoram Kidney Patient Association (MKPA) chuan Aizawla damdawi-in hrang hranga dialysis la mekte leh a enkawltute hnenah ei tur chi hrang hrang an sem. MKPA member-te hi kal thlâk tawhte leh an chhungte an ni.

Chawngtui East
Champhai district-a Chawngtui East chuan nimin khan an khaw community hall-ah an khaw kum 125-na leh rambuai laia khaw khâwm aṭanga an kîr leh kum 50-na an lawm a, minister R Lalzirliana'n a hmanpui a, tlawmngaihna, dikna, huaisenna leh inlungrualnate chhawmnung zel tur leh ruihhlo laka fihlim turin a chah. Chawngtui East hi Khawbung RD block chhunga awm a ni a, chenna in 67 awmin, mi 350 vel an cheng mek a ni.

Loneitute zirtir
Mizoram University-a Departmet of Biotechnology leh KVK, Khawzawl chuan nimin khan Khawhai khuaah loneitute tan Medicinal & Aromatic Plants training an buatsaih. Training neih zawh hian farmers scientist interaction neih a ni a, loneitute hnenah thlai enkawlna tur damdawi chi hrang hrang a thlawna sem nghal a ni.

Pastor seminar
Mizoram UPC chuan March 8, Nilaini leh nimin khan an pastor-te tan Mizoram UPC General Headquarters office, Zonuamah seminar an buatsaih. Mizoram UPC executive chairman Upa Lalzirliana’n 'Pastor-te fuihna' tih thupui hmangin pastor-te thil pawimawh a zirtir a ni.

Ṭanpuina hlan
Mizoram Pradesh Youth Congress Committee president Dr Lalmalsawma Nghaka chuan a pian champha pualin nimin khan Gilead Special School, Bawngkawn hnenah thilpek a hlân. MPYCC President hian pawisa a pek bakah, naupang harsa zual pahnih chu kum khat chhung an zirna leh hostel-a awm man a tumsak dawn a ni.

PC-in LMC-ah
candidate nei lo
PC party chuan Lunglei Municipal Council inthlan turah candidate an nei dawn lo a, an party mite chu an duh zawng thlang turin zalenna an pe. Hemi chungchangah hian PC party office bearer-te chuan nimin khan thutlukna an siam a, "Office ṭhiah leh sak ṭhat buaipuia kan ṭul vanglai tak a ni nen, tun ṭuma LMC inthlanah hi chuan chuh ve lo mai ila kan ti," an ti.