Bamboo Development Agency-in nuai 933.3 dawng; Agarbati stick kg. 8,510 an siam tawh; hralh chhuah a la awm lo thung

Zuangtui Industrial Estates-a Bamboo Processing Factory chuan kum 2019-2023 chhungin cheng nuai 933.3 an dawng a; agarbati stick kg. 8,510 siam chhuak tawh mah se, hralh a la ni lo. Agarbati stick siam nan tualṭo mau hman a ni.

Assembly budget session neih zawh tâkah February 28, 2023 khan Commerce & Industries minister Dr R Lalthangliana'n ZPM member C Lalsawivunga zawhna ziakin a chháng a; November 26, 2021-a Bamboo Processing Factory hawn a nih aṭanga tun thlengin agarbati stick kg. 8,510 siam chhuah a nih tawh thu tarlangin, "Agarbati stick siam chhuahte hi hralh chhuah a la ni lo a, N Ranga Rao & Sons, Mysore hnena hralh turin indawrna kalpui mek a ni. Factory-a agarbati stick siamna atan tualṭo mau hman a ni," a ti.

Bamboo Development Agency (BDA) sum dawn leh hmanna chungchanga zawhna ziaka Commerce & Industries Minister-in a chhan danin, kum 2019-2023 chhungin BDA-in cheng nuai 933.3 a dawng a, cheng nuai 607.03 hman a ni tawh.

BDA hian National Bamboo Mission, Mizoram hnen aṭangin kum 2020-2022 chhungin cheng nuai 767.97 a dawng a; North East Cane and Bamboo Development Council, Assam hnen aṭangin kum 2020-21 khan nuai 25.82 a dawng. North Eastern Council aṭangin kum 2020 khan cheng nuai 136 leh United Nations Development Programme aṭangin kum 2021 khan Rs 3,51,000 a dawng bawk.

BDA hian NBM, Mizoram-in a pek cheng nuai 767.97 zinga nuai 592.97 chu kum 2020-2022 chhungin an hmang a; kum 2022-23 chhunga hmalakna tur cheng nuai 175 atan ruahmanna siam mek niin, sum hman a la ni lo.

North East Cane and Bamboo Development Council aṭangin kum 2020-21 khan nuai 25.82 an dawng a, nuai 22.55 an hmang tawh. NEC aṭanga kum 2020-a an dawn cheng nuai 136 leh UNDP aṭanga kum 2021-a an dawn Rs 3,51,000 chu hman zawh tawh a ni thung.