Khawzawl-Biate kawng siam mek endik

Khawzawl-Biate PMGSY-II road siam mek chu March 8, Nilaini khan PWD, YMA Sub-Headquarters Khawzawl, Tuichangral North Group YMA, Nikuala Group YMA leh contractor-te'n a huhoin an endik a, kawngin a paltlang khuaa YMA branch hruaitute'n an khaw ram chinah an lo ṭawiawm bawk.

Hna thawh muan lutuk vanga tlangdung khuate harsatna tawh nasat dan leh kumina Sialhawk khuaa Sub-Headquarters YMA inkhawmpui neih tur leh Biate-in YMA General Conference an thlen dawn avangin chak taka hna thawk turin YMA hruaitute chuan PWD hotute leh contractor-te an ngen.

PWD hotute tarlan danin, Khawzawl-Biate kawng siam hna chu hna thawh tur zawng zawng aṭangin 48.02% thawh zawh a ni tawh a; kawng/lei laih (formation cutting) bikah ram laka harsata awm avangin laih zawh loh a awm zeuh zeuh tih loh chu an zo thawkhat tawh.

GSB km. 49, WBM-II km. 28.01, WBM-III km. 4.800 leh OPC metre 700 zawh tawh a ni a, kumin ṭhál chhunin WBM-II chin tal zawh hman vek tum a ni. Fûr chhung pawhin lirthei tan tlân hrehawm lutuk loa siam hman an beisei bawk.