March 2023-a zawh tur Tlawng luia lei 2 dawh mekah hmabak a la tam

Reiek kai leh Sihhmui kaia Tlawng lei dawh mekte chu tun thla, March 2023-ah dawh zawh tura tih a nih laiin, hmabak a la tam hle a; Reiei kaia lei chu 68.12% leh Sihhmui kaia lei chu 43.97% chiah dawh zawh a la ni.

Vanglaini thudawn danin, Reiek kai lei dawhna atana sum ruahman (original estimate) chu cheng nuai 558.53 a ni a, ennawn (revised) a nih hnuah nuai 199.03-a tipungin, cheng nuai 757.56-ah a pung chho. Contractor hnenah hian cheng nuai 400.57 pek a ni tawh.

Reiek kai lei dawhna atana sum ruahman aṭangin cheng nuai 400.57 pek chhuah tawh niin, chu chu revised estimate aṭangin 57.22% a ni a; hna thawh tur zinga 68.12% thawh zawh a ni tawh. Lei dawhtu contractor chu Sadguru Engineers & Allied Service Pvt. Ltd., Guwahati a ni a, February 8, 2017 khan original agreement ziah niin, August 31, 2018 khan supplementary agreement ziah a ni.

Inremna ang chuan February 23, 2019-ah thawh zawh tur a ni a; mahse, a hunah dawh zawh a nih loh avangin supplementary agreement hmangin March 31, 2020 thleng hun pawh sei a ni. Hun pawh sei a nih hnuah pawh dawh zawh a la nih loh avangin March 31, 2023 thleng pawt sei leh a ni bawk.

Sihhmui kâia Tlawng lei dawhna atan cheng nuai 4,244 ruahman a ni a, chu'ng zinga nuai 1,424 hman a ni tawh. March 27, 2021 aṭangin Poddar Construction company, New Delhi-in an thawk ṭan a, March 24, 2023-ah dawh zawh tura tih a nih laiin, 43.97% chiah zawh a la ni.

Tlawng lui Sihhmui kaia lei thar dawh turah hian Tantia Constructions, Kolkata chuan August 1, 2009 khan lei an dawh ṭan tawh a, mahse, thawk zo thei loin, August 2012 khan chawlhtir an ni.

Tantia Constructions hi August 2009 leh August 2012 chhunga lei dawh hna an thawhna atan cheng nuai 357.90 pek hman a ni a, bill la pek loh Rs 37,18,520 a awm bawk.