KHAWTHLIR

KTP-in thisen pe
KṬP, Tuikual South Branch chuan an branch din champha pualin March 11, Inrinni khan an kohhran hall-ah thisen pek an huaihawt a, Synod Hospital tan thisen unit 31 an pe a, petute mipa 26 leh hmeichhia panga an ni.

Lok Adalat
Kolasib District Legal Services Authority chuan March 11, Inrinni khan Saipum khuaah Mobile Adalat an huaihawt a, chief judicial magistrate Cacy Malsawmtluangi Ralte hoin member-te an kal. Lok Adalat-ah hian MRB, Vairengte Branch hnuaia kum 2007-a KCC loan lâk rûl ṭha lo mi 172 thubuai ngaihtuah a ni a, mi 79 aṭangin loan rulhna Rs 37,78,562 hmuh lêt a ni. MRB pawhin ngaihhna-thiamna lantirin loan rulh tur an la neih aṭangin a zatve an ngaidam a ni.

PYD inkhawmpui neih tur bawhzui
Mizoram UPC, General PYD Inkhawmpui Lian, September 22-24, 2023 chhunga neih tur inbuatsaih nan General PYD hruaitute chuan March 11, Inrinni khan inkhawmpui neihna tur Serchhip an tlawh a, YMA Sub-Headquarters, Serchhip hruaitute nen inkâwmin, inkhawmpui atana thawhhona turte an sawiho. PYD inkhawmpui lian hi Serchhip P&E Venga Leisekawt Field-ah neih a ni ang.

Bûkna endik
Champhai Bazarpuia sa leh thlai zawrhnaa bùkna leh tehna hmante chu March 11, Inrinni khan Legal Metrology hotute'n an endik a, dan bawhchhia man an awm lo. Bùkna siam rem leh siamṭhat ngaite chu Legal Metrology office-ah an bùknate kalpui tura hriattir an ni.

Mamit district Silver jubilee lawm
Mamit district chuan March 11, Inrinni khan Chhimveng YMA Hall-ah Mamit district silver jubilee an lawm a, Dampa bialtu MLA Lalrintluanga Sailo khuallian niin, Mamit bialtu MLA H Lalzirliana leh Hachhek bialtu MLA Lalrindika Ralte te khualzahawm an ni. Mamit district hi March 1998-ah Aizawl West District tia din a ni a, sq.km 3,025.75-a zau niin, village council 89 leh sub-village 10 a awm mek a ni.

Mumbai-ah MLA tel
Aizawl North-II bialtu MLA Dr Vanlalthlana chu March 11, Inrinni khan Jio Convention Centre, Mumbai-ah June 2023-a neih tur National Legislators’ Conference (NLC 2023) thlirlâwkna leh sawihona, 3rd Visioning Exercise & Discussion on Various Aspects of 1st Historic National Conference 2023-ah a tel a, thu a sawi.

Mi 1 kâng hlum?
March 11, Inrinni khan Ṭialdawngilung khuain lo an hâl a, lo hâlnaa tel ve HC Rinpianga a kâng hlum nia thu dawn a ni. Hetih lai hian, Siachangkawn aṭanga thu dawn danin, HC Rinpianga hi lo hâlnaah kâng hlum anga sawi a nih rualin, a chêtsual dan tak hriat theih a nih rih loh bakah, kâng hlum a nih leh nih loh a chhungte chuan an hre chiang rih lo niin an sawi.

Police leh AR-in heroin an man
Champhai police-te chuan nimin zing khan Khankawn checkgate-ah Champhai aṭanga Aizawl pan lirthei pakhat aṭangin heroin gram 560 (hawng 44) an man a, lirthei khalhtu Gosiankhaia (24) s/o Mangkhama, Ngur, Champhai district nia inchhál khalh an man bawk. Heroin an man hi international market-ah cheng nuai 280 man a ni.
Mizoram Police-a CID (Special Branch) leh 2nd Assam Rifles-te thawkho pawhin March 10, 2023 khan Sihphirah Lalṭhachungnunga (31), Sihphir Venglai leh Lalhmunthari (43), Armed Veng South nia inchhálte hnen aṭangin heroin gram 62 an man bawk. Heroin hi Rs 31,00,000 hu a ni a, a neitute lakah Special Narcotics PS-ah thubuai ziah luh a ni.