Hmeichhe Inkhawmpui Lian a ṭiak

Mizoram Presbyterian Kohhran Hmeichhe Inkhawmpui Lian vawi 50-na, March 10, 2023 zana ṭan chu nizan khan a ṭiak a, vawiin hian palaite'n an khua ṭheuh an pan ang.

Inkhawmpuiah hian March 10, Zirtawpni zan khan palai lawm­na leh report inkhawm neih a ni a; March 11, Inrinni khan Darlawn Kohhran biak-inah Synod moderator Rev. Dr C Chawng­hmingliana hoin rorel inkhawm neih niin, ngaihtuah tura thu lut eng emaw zat rêl a nih bakah, kum 2023-2025 chhunga hruaitu turte thlan a ni.

Kum 2023-2025 chhunga Central Kohhran Hmeichhia office bearer turte chu chairman Zothanpari (Synod ruat), vice chairman Dr Lalthansangi Fanai, general secretary H Lalfakmawii (Synod ruat), assistant secretary Lalmuanzuali, treasurer Zothansiami leh finance secretary R Lalrempuii te an ni.

Hmeichhe Inkhawmpui Lianah hian nimin chhun dinhmun angin, khualchhàwnte hnena palai inhriattir zat chu mi 10,077 an ni a, inhriattir lo leh khaw ṭhenawm aṭanga lehlanga kal eng emaw zat an awm bawk. Nimin chawhma khan mi 13,019 an inkhawm a ni.

Mizoram Presbyterian Kohhran Hmeichhia-ah hian pastor bial 216 awmin, kohhran leh branch church 976 a awm a, member mi 1,92,490 an awm. Chhungkua 1,17,725 awmin, chu'ng zinga 81,030 chuan ni tin chhung inkhawm an nei thei a, buhfaiṭhàm ṭhâm ziah chhungkua 1,16,012 an awm bawk.