BCM Assembly-in Pastor 5 a nemnghet

Baptist Church of Mizoram, (BCM) rorel-na sang ber, BCM Assembly vawi 127-na, Lunglei Salem Veng BCM biak-ina neih chu nizan khan a ṭiak a, nimin khan pastor thar panga nemngheh an ni.

BCM Assembly-ah hian Inrinni khan rorel chhunzawm a ni a, rorel palai 1,348 telin, BCM Assembly-a rorel palai an kal tam ber ṭum a ni. An rorel zingah - BCM danglamna lehkhabua siama sem te, Baptist kohhran ṭawngkam hman dan leh ziah dan bik (Baptist house styles) inang tlang a bua siam te, Hnahthialah administrative area thar siamte a tel.

Nimin khan chawhma inkhawmah BCM president Rev. KV Thanga'n pastor atana lâk, kum thum chhung probation hun hmang zoa paltlang tawh mi pangate pastor atan a nemnghet a; chawhnu inkhawmah Lalpa zanriah kîlho a ni.

BCM report-a a lan danin, BCM-ah hian tualchhung kohhran 680 awmin, member 1,76,404 an awm a, mission field hrang hrangah missionary 1,300 an nei mek a ni.