MNF-in ṭhalaite tana a manifesto-te a tihlawhtling vek tawh - MNF Ṭhalai

Mizo National Youth Front (MNYF) hruaitute chuan March 11, Inrinni khan Aizawl Press Club-ah thuthar thehdarhtute an kâwm a; MNF-in election manifesto-a ṭhalaite hamṭhatna tura an tarlante kum li chhungin an tihlawhtling vek tawh niin an tarlang.

MNYF vice president Zodinpuia chuan, MNF-in kum 2018 election manifesto-ah ṭhalai leh zirlaite hmasawnna tur point 11 a nei tih sawiin, "Covid-19 léng avanga ni 718 zet lockdown kalpui a nih avangin sorkarin hna mumal a thawk thei lo chungin kum 4 chhungin a tihlawhtling vek tawh. Mizo ṭhalaite hi MNF sorkarin a ngaihsak hle," a ti.

Mizoram sorkarin ṭhalaite’n zirna leh an thiamna hmanga hlawhtlinna an neih theih nan nasa takin hmalakna a kalpui tih sawiin Zodinpuia chuan, "Hemi atan hian LESDE leh MYC-te thuam chakin Mizo ṭhalaite hmasawnna turin theihtawpin ke a pên a ni," a ti a; eptu party leh mi ṭhenkhat, sorkar hmalakna sawi bawrhbân tuma hmanhlelte avangin MNF chuan Mizo ṭhalaite hmasawnna tura ke pên chawlhsan a tum loh thu a sawi.