Leitan-Sihphir kawngpui zauh hna ṭan
Chief minister Zoramthanga chuan March 11, Inrinni khan Rohrenga Hall, Sihphirah Durtlang Leitan leh Sihphir inkar kawng zauh leh thawm ṭhat hna thawh ṭanna (work commencement) lungphun a hawng.
Leitan-Sihphir inkar kawng zauh leh thawm ṭhat tur hi Widening and Improvement of Aizawl-Durtlang-Lungdai-Kawnpui road project-a péng (section) pakhat a ni a; km. 10.25-a thui niin, Rs 35,53,00,000 ruahman a ni. Kawng siamtu tur chu SLT Infracon an ni a, thla 18 chhunga zawh tura tih a ni.
CM Zoramthanga chuan, kawng zauhna tur nawr chhuah a khirh nia sawiin, "National highway anga compensation component dah a nih ve loh avangin kawng zauhna atana sorkar ram bak ram lâk hêk ngaite chu compensation inpek theih a ni lo. Hei vang hian sawi fel ngai a awm a, ram neitu te, khawtlang hruaitute leh tlawmngai pawlte nen thawkhoin theihtawp chhuah a ni," a ti.
Mizoramin hmasawnna ruhrel lian, a bik takin intlawhpawhna lamah hma a sawn nia sawiin Zoramthanga chuan, "Hmânlai hun aṭanga thlira huphurhawm taka ngaih - rél kawng, kawng zau ṭha leh inkalpawhna dangte chu vawiinah chuan ṭangkai takin kan hmangin siam belh leh hmalak mek a ni zel. Mizoram hi humhima hma a sawn theihna tur chuan keini a neitute hi kan pawimawh tih hre rengin theihtawp chhuah tlân a ṭul," a ti a; hmathlir ṭha tak neih a, tumruhna nen ûm zui a nih chuan hlawhtlinna a awm ṭhin thu a sawi.
Sorkar thuchhuah tarlan danin, Aizawl-Durtlang-Lungdai-Kawnpui kawng hi Border Road Organization (BRO) enkawl a ni a, kum 2004 khan Aizawl-Durtlang inkar kawngpui zauh a lo ni tawh. Chumi hnuah Leitan aṭanga km. 3.180 pawh intermediate lane tura zauh a ni a; Leitan aṭanga Sihphir khaw tàwp thleng, km. 10.250-a thui siamna atan Central Road Infrastructure Fund aṭangin cheng vbc. 46.57 hmuh a ni.
Kawng siam hi metre 8-a zaua siam tur niin, lirthei zawh tur chin bik chu metre 6-a zau tur a ni a, retaining wall leh RCC frame retaining wall siam tur 32 a awm. Culvert awm sa zawm belh tur 18 leh hume pipe culvert siam belh tur pali a awm bawk.