Chief Minister an inthlak a, ram kaihhruai dan a ngai reng, hei hi thlak kan duh chu ni - Lalduhoma

ZPM leader Lalduhoma chuan, Congress leh MNF hunah Chief Minister inthlak ṭhin mah se ram an kaihhruai dan chu a ngai reng niin hei hi thlak an duh chu a nih thu a sawi a; policy-a rinawm an inzirtir tih sawiin, an sorkar hunah Pathian leh mipui hmaa an thutiamah an rinawm lo a nih chuan 'Min chhuahsan leh dawn nia' ti ngam awm chhun party an nih thu a sawi.

March 11, Inrinnia ZPM Aizawl East-I Block Conference, Ṭhuampui YMA Hall-ah thu sawiin Lalduhoma chuan, "Tunlai hian politics-ah harh tharna a thleng nasa. Party-ah hian rinawm tur a ni lo, policy-ah zawk hian rinawm tur a ni tih pawmtu leh nunpui theitu kan pung zel hi a lawmawm. Pathian leh mipui zara kan lo sorkar ve hunah pawh Pathian leh mipui hmaa kan thutiamah kan rinawm lo a nih chuan min chhuahsan leh dâwn nia ti ngam awm chhun party kan ni," a ti.

ZPM Leader chuan, "Party dang chuan an policy lam an sawi tawh lo a, party-a rinawm an inzirtir ṭhin. Kawng dik loa min hruaitute zui hi mi dik lo nihna zawk a ni," a ti.

Congress leh MNF-te chu an rorel dan kalphung hlui ve ve a nih thu sawiin, "Chief minister an inthlâk a, ram an kaihhruai dan chu a inang reng. He system hi thlak kan duh a, kalphung thar kan sawi ṭhin a, system kan thlak ang kan ti a ni," a ti a, kalphung ṭha hnuaiah chuan thil ṭha tih a awlsam thu a sawi.

Hmasawnna chu a ṭha a, Pathian tel lo hmasawnna a nih erawh chuan a hrisel lo tih sawiin Duhoma chuan, "Pathian tel lo development hi a hlauhawm. Kan ram hian hmasawn se kan duh rual hian, Pathian duh danin kan ram hi ṭhang turin kan duh a ni," a ti.

ZPM working president K Sapdanga pawhin thu sawiin, "Mipui sûkthlêk thlir hian sorkar kalphung thar an nghâkhlel hle tih a hriat theih. Tuna kan ram inrêlbàwl dan hi chuan kal kân a ngah em em a, hmun kilkhâwr zawka mite'n sorkar a awm tih pawh hre lo khawpin hmasawnnain a kal kân nasa. Politics hi inbumna tur a ni lo a, ram rorelna tur a ni," a ti a; ZPM chu mipui beisei pe theitu awm chhun a nih thu a sawi.

Lunglei Municipal Council inthlan tur chungchang sawiin K Sapdanga chuan, "Mi tin maiin ZPM-in candidate in nei ṭha ber min ti a, kan khingpuite pawhin min pawmpui viau niin kan hria," a ti.

Conference-ah hian ZPM leader Lalduhoma'n ZPM zawm thar mi 2,146 a lawm lut niin ZPM thuchhuah chuan a tarlang.