SEC-in inhnamhnawih lo turin hriattir

State election commissioner Laima Chozah chuan March 29, 2023-a Lunglei Municipal Council inthlan tura sorkar hnathawkte zawm tur thupek tichhuakin, candidate emaw, political party emaw ṭan zawng leh ṭan lo zawnga inhnamhnawih lo turin a hriattir.

Laima Chozah chuan, sorkar hnathawk - central, state, autonomous district council leh state public sector enterprise hnuaia thawkte leh LMC huam chhunga sorkar aṭanga sum leh paia ṭanpuina dawng statutory body-te chu Model Code of Conduct-in a phuar vek thu a tarlang.

SORKAR HNATHAWKTE ZAWM TUR

■ Ṭan bik a nei tur a ni lo a, candidate/political party ṭan zawng emaw, ṭan lo zawngin emaw campaign-naah a inhnamhnawih tur a ni lo.

■ Sumin emaw, engti kawng pawhin candidate-te a ṭanpui tur a ni lo.

■ Inthlan kaihhnawih meeting a huaihawt tur a ni lo a, meeting-ah chanvo neih leh thusawi a rem lo.

■ Inthlan kaihhnawihah minister/political functionary dang a zui tur a ni lo.

■ Dan leh thupek kengkawhtu emaw, venhimna lama duty atana ruatte emaw an nih loh chuan political meeting-ah an kal tur a ni lo.

■ Dan leh thupek kengkawh tura ruat police-te chu candidate-in meeting a kohnaah tel anga ngaih tur a ni lo.

■ Ni tin official transaction-a political party hrang hrang nena indawrna neih laiin absolute neutrality an vawng reng tur a ni.

■ Political group, candidate leh anmahni thláwptute'n complaint an thehluh chuan police-te'n ṭan lam nei loin hma an la nghal vat tur a ni.

■ Sorkar hnathawk tu pawhin Model Code of Conduct a bawhchhiat chuan Central Civil Services (Classification, Control and Appeal) Rules, 1965 thupek angin inthununna a hmachhawn ang.