ZMC-a MBBS zirlai hmasa berte'n April 2023-ah internship ṭan beisei

Health & Family Welfare minister Dr R Lalthangliana chuan March 11, Inrinni khan Zoram Medical College (ZMC) a tlawh a, hmasawnna hnathawhte a sawipui a; ZMC-a MBBS zirlai hmasa berte'n April 2023-ah internship an ṭan theih beisei a nih thu a sawi.

ZMC hotute chuan Minister hnenah hian an mamawh - thawktu indaih lohna, building leh quarters chei ṭhat ngaite an lo thlen a; Minister chuan sum awm dan azira ngaihtuah zel an tum thu a hrilh.

Dr R Lalthangliana chuan, ZMC-ah khum 480 vel a awm thu sawiin, "A vaiin rei lo têah hman theih vek a ni ang. ICU khum 30 kan nei mek a, paying cabin (special ward) mi 50 vel len theihna chu hman theih thuai a ni ang," a ti.

HFW Minister chuan, ZMC-ah MBBS zirlai 485 an awm mek thu sawiin, "Kum 2018 batch-te'n thla leh aṭangin internship an ṭan thei tura beisei a ni. ZMC hnuaiah hian Health ministry leh ICMR aṭangin research project 10 vel kalpui mek a ni," a ti bawk.

Minister hi HFW secretary Esther Lalruatkimi, Health Servies director Dr Lalzepuii, Hospital and Medical Education director Dr PC Lalramliana, ZMC director Dr John Zohmingthanga leh registrar Dr Jane R Ralte ten an ṭawiawm a ni.