Bawrhsapin kawng siam mek a endik

Khawzawl bawrhsap CC Lalchhuangkima chuan March 11, Inrinni khan National Highway Infrastructure Development Corporation Limited (NHIDCL) hnuaia NH-06 siam mek a endik a, Puilo khaw dáiah view point tower sakna tur lungphùm a phúm nghal.

Bawrhsap hian Anusha Projects-in NH-06 kawng an siam meka leivûng an paih dan te, Tuisen lui tichhe lo tura hma an lak dan turte a sawipui a; NHIDCL leh an hnuaia contractor-te chu leilung leh nungchate ngaihtuah reng chunga hna thawk tur leh lui humhalh turin a chah.

Anusha Projects aiawhte chuan, an theih chinah gabion wall an siam thu te, lui tui luang tichhe thei tur lung lian leh leivûng luia lutte an then mek thu te, remchang hmasaah leivûng an paihna hmunahte thing an phun tur thute an sawi.