Kum 2022-23 chhungin oil palm metric ton 1,870 hralh tawh

Kolasib District Oil Palm Growers’ Association chuan March 10, 2023 khan Kolasib Diakkawn YMA Hall-ah Mizoram Oil Palm Inkhawmpui hmasa ber an hmang a, Agriculture secretary J Hmingthanmawia'n a hmanpui. Kolasib district-a chhungkaw 278-in oil palm an chíng a, kum 2022-23 chhungin oil palm rah metric ton 1,870 an hralh tawh tih an tarlang.

J Hmingthanmawia chuan, Mizorama oil palm chìn theihna hmuna ngaih zinga 24% chu Kolasib district-ah a awm thu sawiin, "Oil palm vanga sik leh sá leh ram leilung hausakna a chhe zawnga nghawng awm theia sawi zir chiang turin Pilot Research Studies kalpui mek a ni," a ti a; oil palm hralhna man ennawn zel a nih avangin kut hnathawktute tan innghahna tlak leh rin tlak a nih thu a sawi.

Godrej Agrovet hotute tarlan danin, October 28, 2014-a din Bukvanneia Oil Palm Mill-ah kum 2022-23 chhungin oil palm rah cheng nuai 600 man lei a ni a, oil palm rah metric ton 1,870 hralh a ni tawh.

Inkhawmpuia tarlan danin, kum 2005-06 aṭangin Kolasib district-ah oil palm chìn ṭan a ni a; district zau zawng hectare 1,38,251-ah oil palm chìn theihna hectare 14,141 a awm a, hectare 341.5-ah hmalak tawh anga chhût a ni. Chhungkaw 278-in oil palm an chíng mek a, mumal taka hralh thei chhungkaw 182 an awm.