Eirûk dotu SOSA tuaithar a ni

Eirûkna do tura pawl din, Society for Social Action (SOSA) chuan hun eng emaw chen hmalakna an neih loh hnuah March 11, Inrinni khan Bualhranga in, Dawrpui Vengah tuaithar leh a ni a; eirûkna hluar zel do turin hmalak an tum.

SOSA hian member atan mi pakua - ukil leh dan zirlaite an la lut thar a, hruaitu insiam rem nghalin, president atan C Rohriatpuia, secretary atan Aldrin Zothanmawia leh treasurer atan F Lalzarzovi te ruat an ni. Patron atan SOSA din tirh aṭanga hma latu Bualhranga, SL Sailova, IAS (Rtd.), F Hmingthanga leh Rual Zakhuma, IAS (Rtd.) te ruat an ni bawk.

SOSA hi kum 2005 khan din a ni a, Rual Zakhuma leh SL Sailova te president an lo ni tawh. Tuirial Hydel Project siamnaa zangna­dawmna dik lo chungchang leh PMGSY hnuaia kawng laihnaa thil dik lo tam lutuk CBI-in an chhui theihna atana PIL theluttu an ni.