LMC chuh tum zinga 1 hnâwl a ni

Lunglei Municipal Council inthlana chuh tura hming pe mi 44-te nomination paper chu nimin khan election observer Dr Lalngura Tlau hoin endik a ni a, pakhat hnâwl a ni.

Lunglei aṭanga thu dawn danin, nomination paper-te nimina endiknaah hian, Ward no. 2-a BJP candidate tura hming pe Lalremsangi chu kum 25 a la tlin loh avangin hnâwl a ni.

Ward no. 4-a BJP candidate ni tura puan tawh Lalzarmawia pawhin nomination paper a thehluh loh avangin, LMC inthlan turah hian BJP chuan nomination paper nung pakua chiah an nei ta a ni.

LMC inthlan chuh tura hming pe, inhnûkdâwk leh duhte tan vawiin tlai dar 3 thleng hun hawn a ni ang a, naktuk Nilainiah contesting candidate list tàr chhuah a ni ang.

LMC Election Observer hian tun kar chhungin polling station-te a tlawh dawn a ni.