Mizoramah PMAY-G in sak ṭanpuina chhungkaw 20,512-in an dawng tawh

Governor Dr Hari Babu Kambhampati chuan nimin khan Raj Bhavan-ah Rural Development department hotute a kâwm. Mizoramah PMAY-G hnuaiah in sak ṭanpuina dawng chhungkaw 20,512 an awm tawh a, chu'ng zinga 6,509 (31.73%) chuan an sa zo tawh tih tarlan a ni.

Ṭhutkhawma tarlan danin, Pradhan Mantri Awaas Yojana - Gramin (PMAY-G) hnuaiah Mizorama chhungkaw 20,512 chu in sak ṭanpuina dawng tura thlan niin, ṭanpuina pawh pek vek tawh an ni a; ṭanpuina dawng tawh zinga chhungkaw 6,509 (31.73%) chuan in an sa zo tawh a, in sa mek chhungkaw 14,003 (68.26%) an awm.

Governor chuan, Prime Minister-in PMAY-G a ngai pawimawh tih sawiin, "He hmalakna hnuaiah hian kum 2022 a ral hmain chenna in la nei lote'n chenna in an nei vek tura ngaih a nih laiin, kum 2024 thleng hmalakna hi pawhsei a ni a, hun pawhsei leh tâk chhung ngei hian hna thawk zo thei turin RD department-in theih tawp a chhuah a, a ṭan lehzual a ngai," a ti.

Dr Hari Babu Kam-bhampati chuan, PMAY-G hnuaiah Ministry of Rural Deve-lopment aṭangin sum rawn lut tur la lut lo a awm nual thu sawiin, "Hei hi a chhan zawn chhuah ni se," a ti a; a ṭul angin amah pawhin MoRD dawr a inhuam thu a sawi.

RD department thawhrimna zarah ni 100 inhlawhna tluang takin kalpui a nih thu sawiin Larsap chuan, "Hna thawktute hming chhinchhiahna pawh National Mobile Monitoring System application hmang ṭangkaiin 72% aia tam mah dah luh a ni te, ni 100 inhlawhnaa thawkte bank account-ah hlawh ṭha tak leh a hun takah thun a nite hi thil lawmawm tak a ni," a ti.

Inkawmnaah hian RD additional secretary Dr Irene Zohlimpuii Chongthu, joint secretary Ethel Rothangpuii leh deputy secretary Zoremthara Ralte te an tel a ni.