A chhunga chengte'n Mizoram malsawmna an hâi chhuak thei - CM

Chief minister Zoramthanga chuan nimin khan YMA, Khat­la South branch silver jubilee lawmna a hman­pui a; Mizoram din ṭha turin a chhunga chengte'n Mizoram malsawmna an hâi chhuak thei tih a sawi.

CM Zoramthanga chuan, Mizoram din ṭha turin ram chhunga awm sa theihna awmte ngaihtuah a ṭul thu sawiin, "La hman ṭangkai theih ram zau tak, a chhunga chengte châwm zo tham, sik leh sa nuam tak, ruahtui duhthusam, thei leh thlai hrang hrang ṭhat duhna ram kan nei tihte ngaihtuahin, a chhunga chengte hian kan ram malsawmna hi kan hâi chhuak thei a ni," a ti.

Ram hmasawnna atan a chhunga chêng mipui an pawimawh thu sawiin Zoramthanga chuan, "Kan society hi chhe lailet dêr leh beidawnthlak taka chhuah chu a ṭha ber lo a, kan ṭhatna leh chakna, mi dang tana entawn tlak keimahnia awmte hmang hian hma kan sâwn thei a ni," a ti a; ram chhunga theihna awm hmang ṭangkai turin ram luahtute an pawimwh ber thu a sawi.

Jubilee lawmnaah hian Chief Minister-in kum 1998-2023 chhunga YMA, Khatla South Branch office bearer ni tawhte hnenah chawimawina a hlan a; bialtu MLA (Aizawl West-III) VL Zaithanzama pawhin thu a sawi a ni.