Ram kâng vangin mi paruk lakah Police station-ah FIR thehlut

Champhai district-a tun hnaia lo/huan hâla ram tikângtua hriat mi paruk chu dan loa lo hâlah ngaiin, an lakah nimin khan police station-ah first information report (FIR) thehluh a ni.

Sorkar thuchhuah tarlan danin, ram kâng avangin Ngur khua mi pakhat, Champhai Kanan Venga mi pali leh Tlangsama mi pakhatte lakah Champhai District Fire Prevention Committee aiawhin member secretary Lalduhthlana, district forest officer-in Champhai PS-ah FIR a thehlut a; pawi khawihtute chhui chhuak a, an lakah dan tlawhchhana hma la turin a ngen.

FIR-a ram tihkanna hmun tarlante chu - Ngur khaw hmun hluia March 6, 2023-a huan hâl vanga a bul hnaia mimal huan, buh ṭín 12.5 hmun vela zau kâng te, leipui hâl vanga March 8 tlaia Kanan Veng thlânmual ram kâng te, March 11 chawhma dar 10 vela Chhungte VC rama Hnahthial sih chunga lo hâl vanga kângmei chhuak leh buh ṭin 50 hmun vela zau kâng te, March 13 chhuna Tlangsam tuikhuah kawra huan hâl vanga Tlangsam VC ram leh a epa EFCC department plantation-a kângmei chhuakte a ni.

Nimina Tlangsam rama kângmei chhuak vang hian VC ram buh ṭín 10 hmun vel leh EFCC department plantation buh ṭín 7.5 hmun vel a kâng tawh a; nimin tlai dar 5 thleng khan an la ṭhelh mek. Nimin vek khan Hmunhmelṭha leh Zote ramah kângmei a chhuak a, Champhai Fire Station leh khawtlang mite'n an ṭhelh mit a ni.