KHAWTHLIR

Police training

Lunglei leh Serchhip district police-te tan nimin aṭanga khan 'In-service training' buatsaih a ni a, vawiin leh naktukah chhunzawm a ni ang. Lungleiah chuan SP conference hall-ah 'In-service training on Police public relationship’ buatsaih a a ni a, dan chi hrang hrang zirho a ni. Serchhipah chuan police station pathum - Serchhip, North Vanlaiphai leh Thenzawla thawkte tan in-service training buatsaih a ni.

Painting exhibition

Minister Lalruatkima chuan nimin khan Aizawl Art Gallery-ah Ṭanpuia 10th Solo Painting Exhibition a hawng. Exhibition-ah hian Lalṭanpuia lemziah 46 pho chhuah a ni a, March 22, 2023 thleng a awh ang. Minister chuan, mi hlawhtlingte'n an hlawhtlinna phênah mi dangte hriat loh harsatna tam tak an paltlang ṭhin tih sawiin, hlawhtlinna chu beidawnna dawt chiaha awm a nih thu a sawi.

Kuhva rah man

Mamit police, Zamuang Forest checkgate-a duty-te chuan nimin zing khan Myanmar aṭanga dan loa lak luh nia hriat kuhva rah ro ip 115 (kg. 9,200 vel) an man. Kuhva rah mante chu Lalremruata (24), Bualpui, Kolasib district nia inchhál khalh pick-up aṭangin Vairengte aṭanga phurh ip 30 (kg. 2,400 vel) leh Zammunsanga (31), Champhai Dinthar nia inchhál khalh SML truck aṭangin Melbuk aṭanga phurh ip 85 (kg. 6,800 vel)-te a ni.

Alora hawng

Centre for Disease Control, Washington, USA country director (India) Dr Melissa Nyendak chuan nimin zing dar 9 khan Aizawl West College-ah Alora (Centre for Well-Being) a hawng. Alora hi SHALOM leh Aizawl West College-in thawhhona thuthlung an ziah aṭanga kalpui a ni a; counsellor pakhatin ṭhut chilhin, ruihhlo vanga buai leh rilrua harsatna neite tan pan theih a ni. Hawnna inkhawm AWC principal Prof. C Lalthlengliana kaihhruaiah hian AWC Psychology department zirtirtute leh zirlai te, Alora peer volunteer te, an thawhpui SHALOM-a thawktute leh PATH Mizorama thawkte an tel.