LMC Ward-XI chhunga awmte'n LMC huam chhunga awm an duh lo

Lunglei Municipal Council (LMC)-a Ward-XI chhunga chêngte zingah LMC huam chhunga awm ṭha ti lo leh duh lo eng emaw zat an awm avangin, Ward-XI huam chhunga YMA branch-te chu March 12, Pathianni zan khan an inhmu khawm a; candidate turte pawh tel tura beisei an nih angin, MNF candidate tih loh candidate dang pathumte an tel.

Lunglei aṭanga thu dawn danin, LMC Ward XI-ah hian Zobawk North, Zobawk South leh Lungpuizawl te an awm a; chumi huam chhunga Zobawka YMA branch pali leh Lungpuizawl Branch YMA-te chuan an huam chhunga mipui ngen angin, LMC chhunga awm an duh loh chungchangah inrawnkhawmna an huaihawt a ni.

YMA branch pangate chuan candidate tura hming pe tawhte ngaihdan lâk an tum a, candidate-te pawh inrawnkhawmnaah tel turin an sáwm a, BJP, Congress leh ZPM party candidate turte an tel laiin, MNF candidate tur a tel lo.

Party hrang hrang candidate-te'n inhnuhdawh an remtih tlân chuan LMC chhunga awm duh loh lantirna atan candidate awm loa inthlan hmachhawn an rilrûk a; mahse, Pathianni zana inhmuhkhawmnaah candidate an kim loh avangin thutlukna mumal an nei thei rih lo nia thu dawn a ni.