ZPM hian VUC thu an zâwm lo ang - R Lalzirliana

MNF chuan nimin khan an party pisaah chhung inkhawm an hmang a, thusawitu MNF adviser R Lalzirliana chuan, ZPM chuan engtik lai mahin Val Upa Council (VUC) thu an zawm loh tur thu a sawi.

R Lalzirliana chuan, MNF-in senior front an tih ang chu ZPM chuan VUC an tih thu sawiin, "VUC-te chuan VIP culture tihhniam te, MLA hlawh chungchang tihhniamte an sawi ve ṭhin. Mahse, tunah pawh ZPM MLA-te hi designation plate tár mawi ber berte an ni. ZPM MLA-te hian tunah pawh VUC thu an zâwm lo a, opposition nih lai pawha an zâwm lo a nih chuan engtikah mah an zâwm rêng rêng lo ang tih ring rawh u," a ti.

ZPM chu a ṭha zawnga Zoram kaihruai ngam tur anga insawi an nih thu sawiin MNF Adviser chuan, "Party dang zawng aia danglam ngam tura ngaih, Pathian pawh hnaih bik riau nia insawi ṭhin an ni. An hotupa ber, an thiam puipa Pu Duhoma danglam bikna hi politics-a pawl sawn tam bak hmuh tur a awm lo," a ti a, ZPM chu mimal anga mi bei nasa ber party niin a sawi.

R Lalzirliana chuan, pastor zinga nihna sang tak lo chelh ve ṭhin pakhatin ZPM kal danin a rilru a tihnat thu a hrilh nia sawiin, "ZPM hi hun eng emaw chen kha chu rintlakah kan lo ngai ṭhin. Bible ṭan chhana kohhran kan unit ti ṭhin an ni a, Tuirial bial by-election-ah ZPM chêt duh dan aṭang kha chuan a rin ngam tawh loh, tiin min hrilh," a ti.