Mi felte pawhin inkaihhruaina ṭha loah Thil ṭha an ti thei lo - ZPM PAC Member

ZPM PAC member R Lalṭhatluanga chuan nimin khan an party pisaa inkhawmah thu sawiin, mi fel leh thiamte pawhin inkaihhruaina ṭha a awm loh chuan thil ṭha an tih theih loh thu a sawi.

R Lalṭhatluanga chuan, Congress leh MNF chhungkuaah mi fel leh mithiam tam tak an awm thu sawiin, "A chung lam aṭanga inkaihhruaina ṭha a awm loh chuan thil ṭha an ti thei chuang lo. Keini chuan collective leadership tiin thuneihna insem tlân a, a dik chu dik, a dik lo chu dik lo tiin kalphung dik lote siamṭha a, mipui thleng phâk budget siam a, mipuite'n lei rem an rah theih nan kalphung thar kan aupui a ni," a ti.

Assembly session-ah an MLA-te an chêt ṭhat avangin chawimawina an hlan tih sawiin Lalṭhatluanga chuan, "Kan MLA-te hi an fel ber, an ṭha ber kan ti lo. ZPM tan ringawt an thawk lo a, an bial mipui tan chauh pawh an thawk lo a, Zoram mipui tan an thawk tih kan hmu a ni," a ti a, ZPM MLA-te'n ram tan theihtawp an chhuah niin a sawi.

R Lalṭhatluanga chuan, fak tlak fak a, sawisel ngai sawisel ngam tur a nih thu sawiin, "Ram rorelnaah mi ṭha leh mi dikte'n an nihna pawh lan chhuahtir ngam lo kalphung hi kan duh lo. Thil rêng rêng a nihna ang taka a lan chhuah a, langtlang sorkar kan neih theihna turin Pathian duh zawng anga kan thawhrim chuan, a malsawmna changin ZPM hi a hmanrua kan ni thei ang,” a ti.

Inkhawmah hian ZPM working president K Sapdanga'n Lunglei Municipal Council Campaign Committee hmalakna tlangpui a sawi a ni.