School Education-ah hmasawnna nasa tak a awm - Education Minister

School Education minister Lalchhandama Ralte chuan nimin khan Kawlkulh, Saichal leh Hliappui khuate a tlawh a, bialtu MLA L Thangmawia, HRD Board vice chairman-in a ṭawiawm. Minister chuan, MNF kaihhruai sorkar a din hnu hun rei lote chhungin School Education department-ah hmasawnna nasa tak hmuh tur a awm niin a sawi.

Lalchhandama Ralte chuan amah hmuaktu zirlaite hmaah thu sawiin, "Hmun tinah zirtirtu indaih lo thâwm hriat tur a awm a, MLA-te'n an fund hmangin zirtirtu an ruai sup sup a. Tun­ah chuan zirtirtu indaih lohna phuhrûk nan hian zirtirtu sang chuang lak a ni ta a, indaih lohna zualpui phuhrûk a ni ta a ni. Hmasawnna hna chi hrang hrang hi ṭum khatah tih vek theih a ni lo a, a tahtawlin sorkarin a thawk zel dawn a ni," a ti.

Khawtlang hruaitute chu naupang hunpui, an exam leh hun pawimawhte zahsak a, zirlaite tan boruak ṭha siam tura chahin Minister chuan, "Khawtlangin zirna a ngaih pawimawh hi ram hmasawn nan a pawimawh hle a ni," a ti a; zirlaite chu thingtlanga awm ni mah se, an zirnaah theihtawp an chhuah chuan khawpuia zirlaite nen an inang reng tih hre turin a chah.

Human Resource Deve­lopment Board vice chairman L Thangmawia pawhin thu sawiin, sorkarin kawngpui chhia a ngaimawh a, mutmawh hnarmawhah a nei tih a sawi a, "Kawngpui siam nan hian DPR-te central-ah thehluh a ni a, bawhzui nghal zel a ni. DPR thehluh tawh zingah Saitual leh Saichal inkar kawng siam­na tur pawh a tel a ni," a ti.