Kawlphetha man tisang tura rawtna dodalna pathum JERC-in an dawng

Mizoram sorkarin kawl­phetha hman man tisang tura rawtna Joint Electricity Regulatory Commission (JERC) for Mizoram and Manipur hnena ngenna a thlen chungchangah, JERC chuan dodalna pathum an dawng.

JERC hnenah hian Mizoram sorkar chuan kum 2023-24 atan kawlphetha man tisang tura rawtna a thlen a; power tariff hman mek chu 3.15%-a tisang turin JERC-ah a rawt a ni. Sorkar rawtna ang hian kawlphetha hman man tihsan a nih chuan, kawlphetha unit 1 man Rs 7.83 ni ṭhin chu Rs 8.08 a ni tawh ang.

Mizoram sorkarin kawl­phetha hman man tisang tura rawnna a thlen chungchangah hian JERC chuan sawi duh nei tan hun a hawng a; hun hawn chhungin dan ang takin Mizoram Counsumer Union (MCU) leh Central YMA president hlui Vanlalruata ten dodalna an thehlut a ni.

ZPM party pawhin kawl­phetha hman man tihsan dodalna an thehlut a, mahse, document ngaite an thehluh kim loh avangin dan angin pawm theih a ni lo thung.

JERC hotute hnen aṭanga thu dawn danin, MCU leh Vanlalruata te hian kawlphetha hman man, power tariff hman mek chu a san tawh tho avangin, tihsan belh ṭul lo an tih thu an tarlang a ni.

Hetih lai hian, JERC chuan kawlphetha hman man chung- changah hian March 22, 2023 khian vantlang huap sawihona (public hearing) a ko. Public hearing-ah hian kawlphetha man tihsan duh lote'n tihsan an duh loh chhante an sawi thei dawn a, Power & Electricity department-in tihsan an rawt chhan an sawifiah bawk ang.

Joint Electricity Regulatory Commission danah chuan, kawl­phetha hman man hi kum tin ennawn tur a ni a, ennawn a nih avangin tihsan ngei ngei tur tihna a ni lo thung.