AR buatsaih Phawngpui Expedition-a telte Governor hoin lo lawm an ni

Assam Rifles-in Phawngpui Expedition a buatsaiha telte chuan nimin khan Aizawl an thleng leh a, Raj Bhavan-ah Governor Dr Hari Babu Kambhambati hoin anmahni lo lawmna hun hman a ni.

Phawngpui Expedition hi G20 puala buatsaih niin, thupui pawh 'One earth, One family, One nature, One future' tih a ni a; Mizoram Outdoor Youth Adventure Club member mi 30 (mipa 16 leh hmeichhia 14) telin, March 10, 2023 khan chief secretary Dr Renu Sharma-i'n a vailiam.

Assam Rifles 23 Sector DIG Brig. Girish Upadhya leh officer dangte nen Phawngpui tlángah an láwn a, March 12 khan Phawngpui tláng chhîp, metre 2,157-a sang an thleng a ni.

Expedition-a telte hi nimin chhun khan Aizawlah an rawn lêt a, Raj Bhavan-ah Governor hoin anmahni lo lawmna hun hman niin, thingpui an inho a; Larsap chuan, Assam Rifles-in expedition an buatsaih leh tluang taka Phawngpui tlang an láwn chhuak chu a lawmpui thu a sawi.

Hari Babu Kambhampati chuan, Expedition chuan ṭhalaite leh Mizoram mipuiah tourism leh adventure tourism huanga Mizoramin theihna sang tak a neih chungchang ring takin sawi se a duh thu sawiin, Expedition-a telte chu Mizo ṭhalai zingah nun dan hrisel inkawhhmuhnaa hma hruaitu ni turin a chah a ni.