Kolasib district-a ram neitute'n District Forest Act ṭhiah an duh

Land Owners Association National Highway 06 & 306, Kolasib district chuan nimin khan Vairengte dáiah awareness campaign an buatsaih a, Mizoram District Forest Act, 1965 chu thuneitute'n tibo tawh se an duh thu an sawi.

Ram neitute sawi danin, Mizoram District Forest Act, 1965 chuan mipui harsatna a thlen nasa a; dan hnuaiah hian Vairengte aṭanga Sairang inkarah kawng aṭanga metre 800 chin chu Forest ram (road side reserved area)-ah puan a ni.

Mizoram District Forest Act chu a taka hman theih a ni tawh lo tih sawiin ram neitute chuan, "Metre 800 huam chhungah hian sorkar office, mimal in leh huante a awm vek tawh. Min chhuahtir dawn se, kan awmna tur sorkarin a ngaihtuah a ngai dawn a, thil tih theih loh tluk a ni tawh," an ti.

Dan hman tlak tawh loh chu thuneitute'n ennawn se an duh thu sawiin, "Siamṭhat ngaite siamṭhain emaw, a ṭul a nih chuan tibo tawh mai se kan duh," a ti a; dan awmze nei tawh lo neih reng chu a ṭulna an hriat loh thu an sawi.

Ram neitute sawi danin, Mizoram District Forest Act hi Gauhati High Court, Single Bench-in a hnâwl a, mahse, Mizoram sorkar leh Centre for Environment Protection (CEP) chu Supreme Court-ah an zualko zui a, Supreme Court chuan Gauhati High Court Principal Bench ngaihtuah turin a dah.

Supreme Court-a zualkonaah hian Mizoram sorkar chu a inhnûkdâwk tawh a, chumi hnuah order siamin, Vairengte-Sairang inkar kawng thlúr li-a laih tura package 3-4 chhunga mite'n zangnadawmna an lâk theih phah a ni.

Gauhati High Court Principal Bench chuan Single Bench-in thutlukna a siam tawh chu stay in, Mizoram District Forest Act, 1965 chu a nung leh tawh. Hei vang Forest department lamin thing kih phalna an pek theih loh avangin NHIDCL chuan package 3-4 ah hna an thawk thei rih lo. Package 5 leh 6-ah chuan ram neitute'n zangnadawmna an la dawng lo.

Gauhati High Court Principal Bench chuan Mizoram District Forest Act, 1965 chungchang hi a ngaihtuah leh hnai tawh nia thu dawn a ni.

Nimina awarness campaign-ah hian Mizoram tan NH kawngpui thlur li pawimawh dan te, Mizoramin a ṭangkaipui dan tur te, zangnadawmna pek vek tawhna ramah pawh hna thawh theih a la ni lo chu a ṭhat loh thute an inhrilhfiah a ni.