Mizoramah kum 13 chhungin innei tuak 35,196 sorkarah an inziak lut
Nupa tuak tharte sorkara an inziah luhna tur dan, The Mizoram Compulsory Registration Marriages Act, 2007 hman a nih hnuah kum 13 chhung, April 2008 aṭanga March 2022 thleng khan sorkarah tuak 35,196 an inziak lut.
Law & Judicial department-a Registrar General of Marriages hotute hnen aṭanga Vanglaini thu dawn danin, Mizoramah kum 2008 aṭanga The Mizoram Compulsary Registration Marriages Act hman a nih hnuah, April 2008 aṭanga March 2022 thleng khan innei inziak lut tuak 35,196 an awm a, chu'ng zingah chuan Kristian dana innei an tam ber.
April 2008 aṭanga March 2022 thlenga innei thar sorkara inziak lut zinga Kristian dana innei chu tuak 32,611 an ni a; Buddhist dana innei tuak 2,424, Hindu dana innei tuak 157, Muslim dana innei tuak khat leh sakhaw dang (others) dana innei tuak thum an awm.
Registrar General of Marriages hotute chuan, innei tharte sorkara inziah luh chu khawpuiah miin an ngai pawimawh viau tawh a, thingtlang lam mite erawh chuan an ngai pawimawh lo tih an sawi a, "Kum 2008 hnu lama inneite aṭangin kan ziak lut ṭan a, inziak lut zinga ṭhenkhat chu an hna thil vang leh ram páwna zin tum bik tan DC/ Court-a inneihna certificate-te ram dang embassy-te'n an pawm loh avangin, heta rawn inziak lut leh hnuhnawh an awm ṭhin," an ti.
The Mizoram Compulsary Registration Marriages Act hnuaiah hian inneih aṭanga thla khat ral hmain sorkarah inziah luh tur a ni a, thla khat a ral hnuah chuan late fee Rs 100 chawiin inziah luh tur a ni. A hnu lam zelah chuan late fee hi thla tin Rs 50 zelin a pung a, late fee hi Rs 1,000 thleng chawi theih a ni.