March 31-ah Amit Shah a lo zin dawn

Union Home minister Amit Shah chu March 31, 2023 khian Aizawlah a rawn zin dawn a, Zokhawsanga Assam Rifles complex a hawn dawn bakah, Lammual sira Laldenga Cultural Centre sak tur lungphùm a phúm dawn niin sorkar thuchhuahin a tarlang.

Union Home Minis­ter dawnsawn dan turah nimin khan chief secretary Dr Renu Sharma hoin sorkar hotute CS conference hall-ah an ṭhukhawm a; Zokhawsanga Assam Rifles hmun siamtu/satu Engineering Projects (India) aiawhte chuan, an hnathawh hrang hrang 13 an zawh vek tawh thu leh, quarters ṭhenkhat AR hnena hlan chhawn tura an pek tawh, AR-in an lâk chhâwn theih rih loh chiah mutàn an neih thu an sawi.

Sorkar thuchhuah tarlan danin, Assam Rifles aiawhte leh Mizoram sorkar hotute'n an sawiho hnuah Zokhawsang hi vawiin chawhnu dar 2:30-ah a hmunah a huhoa enfiah tum a ni a; Union Home Minister hoa hun hmanna tur hmunhmate pawh enfel nghal tum a ni.

Lammual hmâr lama Laldenga Cultural Centre sak tura ruahmanna chu Aizawl Smart City Project hotute'n ṭhutkhawmah hian an sawifiah a; cheng nuai 193 sénga sak tura ruahman a nih thu leh metre 75x90-a zaua sak a nih tur thu an sawi.