KHAWTHLIR

Thisen pe

College of Veterinary Sciences & Animal Husbandry NSS unit chuan nimin khan Selesiha an hmunah thisen pek an huaihawt a, Civil Hospital, Aizawl tan thisen unit 60 an pe.

LMC inbuatsaihna

Lunglei Municipal Council (LMC) inthlan lo awm tur atan nimin khan Lunglei High School-ah presiding officer leh polling officer-te pualin training buatsaih a ni. LMC inthlanah hian polling station 44 a awm dawn a, presiding officer, first polling officer leh second polling officer mi 55 ṭheuh ruat a ni.

DC-in paih khap

Lunglei DC Ramdinliani chuan Lunglei Municipal Council huam chhungah UDPA department emaw, VC emawte'n bawlhhlawh paihna hmun tura an ruat ni loah bawlhhlawh paih khap a nih thu a tarlang. Lunglei khawpuia Lunglawn, Ramthar Veng, Chanmari, Luangmual - Sazaikawn kawng dungah a hmun loa bawlhhlawh paih a ni ṭhin tih hriat a nih thu leh, thupek zâwm lote chu IPC Section 188 hmanga hrem theih an nih thu a tarlang bawk.

AR-in zu an man

Assam Rifles chuan March 12, 2023 khan Mélbûk, Champhai district-ah Myanmar zu, cheng nuai 6.68 hù an man a, Champhaia Customs department hnenah an hlân. Zu man kaihhnawihah mihring man an nei lo thung.

Health clinic thar

Mizoram Legislative Assembly deputy speaker H Biakzaua chuan nimin khan Lungtian health clinic a hawng a, LADC executive member leh MDC eng emaw zatin an ṭawiawm.

Minister-in hmanpui

Transport minister TJ Lalnuntluanga chuan nimin khan Chite Inpuia Mizoram Taxi Association hruaitu thar thlanna hun a hmanpui. Minister chuan, taxi vawi khat chauh thlâk theih ṭhin chu vawi hnih thlâk theih turin sorkarin hma a la mek niin a sawi a, passenger phur motor an nih angin an motor-te fitness chungchang ngaipawimawh a, faina leh lirthei enkawl kawngah theihtawp chhuah ṭhin turin a chah.

Kawng thar hawng

Champhai North bialtu MLA Dr ZR Thiamsanga chuan nimin khan a bial chhunga Ngàizáwl leh Neihdawn inkar kawng lai thar a hawng. Kawng hi km. 5-a thui a ni a, Special Assistance to States for Capital Investment sum nuai 90 hmanga siam niin, September 20, 2022 leh November 24, 2022 chhungin siam a ni.

Sawn lo turin ngen

Hnahthiala VC presi­dent-te leh MNF South Tuipui West Block hruai­tute nimina Hnah­thial Venglai YMA Hall-a ṭhu­khawm chuan, tun hnaia MCS office eng emaw zat sîksâwiah Hnah­thial SDO (Sadar) Lal­rem­ruata Sailo chu hmun danga awm tura tih ni mah se, Hnahthialin an la mamawha an hriat avangin sawn chhuak lo turin Mizoram sorkar an ngen. Lalremruata Sailo hian SDO (Sadar) hna bakah, DUDO, SO, EO leh BDO hnate a kawp niin an tarlang.