Mizorama khaw 193-a chhungkaw 2,733-te'n oil palm an chíng mek

Governor Dr Hari Babu Kambhampati chuan nimin khan Raj Bhavan-ah Agriculture department, Godrej Agrovet leh Patanjali Foods hotute oil palm chungchang a sawipui. Mizorama khaw 193-a chhungkaw 2,733-in oil palm an chíng mek nia tarlan a ni.

Ṭhutkhawma tarlan danin, Mizoramah The Mizoram Oil Palm (Regulation of Production & Processing) Act, 2004 peih a nih hnuah kum 2005-06 aṭangin oil palm chìn ṭan a ni a; a tìra chhût dan chuan Mizoramah oil palm chìn theihna ram hectare 66,791-a zua a awm a, hectare 26,730-a zauah chìn a ni.

Chhan hrang hrang vanga oil palm chíng an tlem hnuah tunah hian district pasariha ram hectare 3,398-a zauah chìn mek niin; khaw 193-a chhungkaw 2,733-in an chíng mek. February 2023 rate angin oil palm hi kg. khat Rs 10.28 man a ni.

Governor chuan, National Edible Oil Mission-Oil Palm (NMEO-OP) kalpui mekah Prime Minister-in state tinte hriak ei chi thar leh siam te, bê (pulses) leh oil palm thar lamah ṭan la zual turin a hriattir tawh tih a sawi a, "India ramin kum khata hriak ei chi a mamawh zinga 60% hi Indonesia leh Malaysia aṭangin sum tam tak sénga lei a ni a, be lam chi - dailuah, bekang, chánâ leh a dangte pawh ram chhunga tharte kan khamkhawp lo hle a ni," a ti.

Intodelh tura sorkar laipui hmachhawpah Mizoram pawhin tih theih a nei tih sawiin Larsap chuan, "Kan state hian ṭan a lak nasat a ngai. Hma kan sawn phawt chuan state sum thawh chhuah a pun bakah, kut hnathawktute'n hlâwkna an tél dawn," a ti a; NMEO-OP inkaihhruaina anga theihtawp chhuah tur leh kut hnathawktute kaihruaia an hmalaknate enpui tur te, oil palm leh hriak nei thlai - anṭam, bekang, chhawhchhi leh bê lamah hmasawn a nih theih nan ṭan la lehzual turin a chah a ni.

Tarlan danin, Mamit district-a West Serzawl khuaah Oil Palm Seed Garden kalpui mek a ni a, kum 2024-25 velah oil palm chi (seed) thar ṭan beisei a ni. Lawngtlai district-a Rualkual khua, Liapha hmunah oil palm herna khawl bun tum a ni bawk.

Hriak atana sâwr chi thlai (oil seeds) - anṭam, bekang, chhawhchhi leh a dangte chu ram hectare 3,024-a zauah chìn mek a ni a, metric ton 3,158 vel thar ṭhin a ni.