MPYCC-in hlawh pe turin sorkar phût

Mizoram Pradesh Youth Congress Committee (MPYCC) chuan, hun rei tak Dampa Tiger Protection Force-te hlawh sorkarin a pek tawh lohte pe nghal turin Mizoram sorkar an phût.

MPYCC chuan thuchhuah siamin, Dampa Tiger Protection Force-te'n thla ruk chhung hlawh an la tawh lo chu pawi an tih thu an tarlang a, "Mizoram sorkarin an hlawh a batsakte a bo a bâng awm loin a rang thei ang bera pe nghal turin kan phût a, an tihlawhtling thei lo a nih chuan an thlavâng hauhin hma kan la zel dawn," an ti.

Hlawh pek theih loh chhan chu Mizoram Finance department-in Dampa Tiger Reserve Field Director account-ah sum an pek har vang leh EFCC department-in first instalment an hmanna leh an hman chhuahna (utilisation certificate) sorkar laipuia an thawn har vang a nih thu sawiin MPYCC chuan, "Vanduaithlak kan ti tak zet. Mizoram sorkar Pu Zoramthanga kaihhruaiin sum a enkawl thiam loh vang leh an inthlahdah vang liau liau a ni," an ti a; sorkar laipui aṭanga sum rawn kalte a hmanna tur dik tak ni lo, thil danga hman ṭhinin a hrin chhuah niin an tarlang.

Thawktute'n hlawh an lâk theih loh avangin Dampa Tiger Forest chu tihcherêu mek a ni tih sawiin MPYCC chuan, "Duty an awm loh avangin a rûka sa pêl leh lui kal an pung thar hlea sawi a ni. Sorkar ṭha lo leh a ngaihna hre lo hnuaiah Mizoram ro hlu Dampa Tiger Forest Reserve kan chán mek hi lungchhiatthlak kan ti hle," an ti.

Congress ṭhalaite chuan, "Dampa Tiger Reserve chu an enkawl zo ngang lo a nih chuan tlàwmah la lo a, a ngaihna hria leh sum enkawl thiam Pu Lalsawta leh a thawhpuite ráwn hreh lo turin Finance minister Zoramthanga leh EFCC minister TJ Lalnuntluanga te kan chah a ni," tiin an tarlang.