HIV/AIDS do chungchang sawiho

Health & Family Welfare minister Dr R Lalthangliana kaihhruaiin nimin khan Secretariat conference hall-ah HIV/AIDS chungchanga inràwnkhawmna, 'Multi Sectoral Stakeholders Consultation on HIV/AIDS in Mizoram' buatsaih a ni a; Mizorama HIV/AIDS vei tam ber chu kum 25-34 inkar an nih thu tarlan a ni.

Ṭhutkhawma tarlan danin, Mizoramah HIV/AIDS vei dan hlawm lian chi hnih a awm a - mipat hmeichhiat hman khawlohna leh ruih theih thil ti ṭhinte'n hriau thianghlim lo an inhman ṭâwm aṭanga kaite a ni. HIV/AIDS vei tam ber chu kum 25-34 inkar an ni a, kum 35-49 inkarte'n a dawt.

HIV/AIDS dona atan NACP5 kalpui mek a ni a, kohhran, tlawmngai pawl leh sorkar department a tam thei ang ber thawhpui tum a ni.

Dr R Lalthangliana chuan, HIV/AIDS do turin ṭan rual a pawimawh thu sawiin, "HIV-in Mizo, a bik takin ṭhalaite a suat nasa a, India ramah pawh a percentage-a HIV/AIDS vei tamna ram kan nih avangin theihtawpa kan do a pawimawh. Department pakhat hmalaknaa thawh zawh rual a ni lo a, ṭan khawm a pawimawh a ni," a ti.

Ṭhutkhawmah hian UNAIDS, United Nations International Children's Emergency Fund (UNICEF) leh a kaihhnawih pawl dangte an tel a; UNAIDS, CDC leh UNICEF aiawhte chuan, Sustainable Development Goals-in kum 2030-a AIDS ûmbo a tumna chu ngawrh zawka kalpui a ṭul thu an sawi.