Festival-cum-Street Food Festival ṭan a ni

Urban Development & Poverty Alleviation (UDPA) department chuan Deendayal Antyodaya Yojana - National Urban Livelihoods Mission (DAY-NULM) hnuaiah Aizawl City Mission Mangement Unit (CMMU) kaltlangin nimin khan Aijal Club Park-ah ni thum awh tur DAY-NULM Festival-cum-Street Food Festival an buatsaih ṭan a, UDPA director H Lianzela’n a hawng.

Exhibition cum Street Food Festival hi vawiin leh naktukah chhunzawm a ni dawn a, chawhma dar 10:30 aṭanga zan dar 8 thleng dawr theih a ni ang. Exhibition stall 21 leh food court pariat awmin, DAY-NULM hnuaia hma latu mi hrang hrangin an thil siam chhuahte an pho chhuak a, naupang tan intihhlimna buatsaih a ni bawk.

DAY-NULM Festival-cum-Street Food Festival hawnna inkhawm hi DAY-NULM project director Malsawmzuala'n a kaihruai a; UDPA director H Lianzela chuan, DAY-NULM hnuaia hamṭhatna dawngtute chu an hnathawh leh thil tihnaah rinawm leh taima taka thawk zel turin a fuih a, "UDPA hnathawh hi khawpui tihhmasawn piah lamah, khawpuia chêng retheite chawi kân a tel a, sorkar laipui pawhin a ngai pawimawh hle a ni," a ti.

H Lianzela chuan, mi hlawhtling tam takte bul ṭanna chu tláwm tê a nih thu sawiin, "Retheihna leh harsatna tam tak paltlanga tumruhna nena ding chhuak an ni a, anni ang bawk hian tumruhna leh taimakna nen kan hlawhtling ve thei a ni tih kan hriat a ngai," a ti a; Exhibition & Festival tlawh turin mi tin a sáwm a ni.