Budget chungchang zirhona buatsaih; State dangte leiba zat ngaihtuah chuan ba lo ang tluk kan ni - Chief Minister

Mizoram Journalist Association (MJA) leh Finance department ṭangkawp chuan nimin khan Aijal Club-ah 'Seminar on Mizoram State Budget' an buatsaih a, a hawngtu chief minister Zoramthanga chuan state dangte leiba zat ngaihtuah chuan Mizoram chu ba lo ang tluk a nih thu a sawi.

Chief Minister chuan nitin zantin sum dinhmun report a hriat ṭhin thu sawiin, "Chawhma leh chawhnu pawh a dang a dang a ni. Tichuan leiba tih chu an han en a, keini kan sorkar hmasak khan cheng vbc. 3000 vel kan ba a ni. Mihring chuti zat kan nia, mihring chuti zatin chuti zat chu kan ba ṭheuh an tia, dawt chu a ni miah lo, a dik," a ti.

Leibate chu sorkar laipui phal avanga ba an nih thu sawiin Zoramthanga chuan, "Cheng vbc. 3,000 vel sorkar hmasaa kan bat lai khan state lianin an bat chu vbc. 90,000 vel a ni. Opposition kha au dawn se la chu au ring ber tur an ni," a ti a, tun dinhmuna Mizoramin leiba a neih chu cheng vbc. 12,000 vel a nih thu a sawi.

CM Zorama chuan India ram state zingah Mizoram chu leiba nei tlem ber dawttu a nih thu sawiin, "A ba tlem ber chu Sikkim an ni a, keini aiin vbc. 9 in an ba tlem. Amaherawhchu, kan state a tê a, state lian chuan economy pawh an nei ṭhaa, an ba tam tur a ni," a ti.

Hmarchhak state-a Mizoram tiatpui dangten Mizoram aiin an bat tam vek thu sawiin Zoramthanga chuan, "State lian ṭhenkhat phei chuan cheng vbc. nuai 6 te an ba a, keini vbc. 10,000 vel," a ti a, state dangte leiba ngaihtuah chuan Mizoram chu ba lo ang tluk a nih thu a sawi.

Chief Minister chuan a percentage vela chhut kualin, leiba nei tlem ber dawttu Mizoram chu a ba tam berah chhuah a nih thu sawiin, "Ngawiteh u kan hrethiam lo a ni e. A pehhelnaa kawng chi dang danga zuk sawia kha a ṭul lo e. A reality, a nihna taka kha sawi mai tur a ni e," a ti.

ADB-ah health care tur cheng vbc. 1,000 loan lak tur an dil tih sawiin Chief Minister chuan, "India sorkarin cheng vbc. 720 an rul dawn a, keini vbc. 280 kan rul ang," a ti a, ADB loan ang chu puk zel tur awm se thil ṭha tak a nih thu a sawi.

Seminar hi MJA president C Lalrambuatsaiha'n kaihruaiin, resourse person Finance addl. secretary Ramchhuana'n budget chungchanga hriattur pawimawh hrang hrangte a sawi bakah, MJA member-ten zawhna an neihte a chhang nghal a ni.