MNF chhawp chhuah hmasawnna a tam - Lalruatkima

Tuirial East Block MNF chuan nimin khan Nisapui Volleyball Court-ah khawmpui an hmang a, an hun hmanpuitu MNF adviser Lalruatkima, minister chuan MNF chhawp chhuah hmasawnna a tam niin a sawi.

Lalruatkima chuan, Mizoramah hmasawnna hrang hrang a thleng mek zel nia sawiin, "Zirtirtu 3,000 chuang kan la a, zirlai pawh an lo ṭhahnem ta. Kum 5 chhunga MNF chhawpchhuah hmasawnna hi a tam asin. Sorkar hmasaah kawng a chhe em em a, tunah erawh chuan kan kawng pawh hi a nuam ta hle. Kawngpui ṭha avangin Zoram kâr kan pawt tawi nasa hle a ni," a ti.

MNF Adviser chuan ZPM hotuten kalphung thar an sawi chu thuneihna leh lal duhna chauh nia sawiin, "Nationalist kan ni, tia Zoram Nationalist Party lama min kalsan ta ZPM member ni ta te, in pianna ram MNF-ah lo kir leh turin thinlung takin kan sawm che u," a ti a, ZPM chuan nationalist an sawi ngai tawh loh bakah, an zawrh loh thu a sawi.

MNF party-in chhuan tur an neih chu Pathian chiah nia sawiin Lalruatkima chuan, "He kan zui, kan chhuan Pathian hian Covid-19 karah pawh Israel fate mana leh vahmin a pe ang mai khan ei tur min pe. Kohhran, tlawmngai pawl leh sorkar thawhhona ṭha malsawmna kan dawng a. Min thlahthlam ngai lo Pathian hian kawng chanveah min kalsan lo ang," a ti.

Lalruatkima chuan Congress party chu pa ṭha tak Lalsawta'n hruai mah se, a kang hleithei chuang lo nia sawiin, "India ramah an hniam telh telh. Ṭhat loh theih lohna bawm an zuar a, ṭha thei reng reng lote kha an awmkhawm a ni. Sorkar meuh tur chuan an beisei awm lo," a ti a, Congress chuan an bial ṭha ṭhin minority bialah pawh BJP-in ei tê zelin, an party an ṭhat chhoh zel thu a sawi.

Kumin MLA inthlanah an sorkar nawn leh ngei tur thu sawiin MNF Adviser chuan, "Hun harsa leh khirha ram hruai tlaka min ngaitu hian hun ṭhaa ram kan hruai hi a phal ang tih ka ring. SEDP pawh 2nd installement pawh tun thla chhung hian sem hman tum a ni a, 2nd phase pawh July thla chhoah sem hman tuma chak taka hmalak mek a ni," a ti.
MNF thuchhuah tarlan danin, Lalruatkima hian an party-ah mi 76 a lawmlut a ni.