Candidate nei ṭha ber kan ni - ZPM Ṭhalai President

Nimin zing khan Lunglei Electric Vengah ZPM campaign office hawn a ni a, he hunah hian ZPM ṭhalai president Dr Lalrammawia chuan Lunglei Municipal Council (LMC) inthlan lo awm turah an party chu candidate nei ṭha ber an nih thu a sawi.

ZPM Ṭhalai President chuan, an candidate-te chu sum leh hamṭhatna hrang hrang hmanga sawm chhuah theih loh an nih thu sawiin, "ZPM kalphung thar policy hmanga ram siamṭha tura kan sawmna tlawmte thlang zawk candidate kan nei hi a lawmawm hle a, beiseina sang tak kan nei. Candidate nei ṭha ber kan ni," a ti.

LMC inthlan chu candidate leh an chhungte emaw, veng bil inbeihna a ni lo tih sawiin Dr C Lalrammawia chuan, "Party kalphung inbeihna a ni. Lunglei mipui hian koh eih zawh loh leh, mipui harsatna auchhuahpui ngam lo ram hruaitu thlan tlin an duh tawh lo," a ti a, Lunglei mipuiten an party policy chu LMC-ah hmuh nghal an duh tawh thu a sawi.

Dr C Lalrammawia chuan MNF leh Congress aṭangin ram siamṭha turin an party-ah an lut zel tih sawiin, "Politics-a harhtharna thleng avangin politics-a neutral ni ṭhinte pawh langsara ZPM-a inpek ngei an duh tawh a ni. Ṭhalai zingah phei chuan tun anga MNF party-a lut chu ngaihdan tawk an nei zel tawh a ni," a ti.

ZPM thuchhuah tarlan danin, ZPM Ṭhalai President hian an party-ah mi 37 a lawmlut a ni.