Old pension scheme hman hi sorkar tan a zangkhai theih hmel zawk - Lalsawta

MPCC chuan nimin khan an pisa-ah kumina MLA inthlan tura an party manifesto-a tel old pension scheme (OPS) chungchang zirhona an buatsaih a, MPCC president Lalsawta chuan OPS hman chu new pension scheme (NPS) hman aiin sorkar tan a zangkhai theih hmel zawk thu a sawi.

Lalsawta chuan, September 1, 2010 hma-a sorkar hnathawk lâk tam takte kum 25 aia naupang tam tak an awm tih sawiin, "Hemi ní hmaa an service regularise hman loa, a hnua service regularise an nih chuan NPS hnuaia awm tûr an ni. Chutiang mi chu Mizoramah mi 9,000 vel nia hriat a ni. Heng mi 9,000 velte hi chawhrualin kum 25 mi ni ta se, August 2045-ah an pension dawn hlawm a ni," a ti.

August 2045-ah OPS hnuaia thawkho an zo chiah dawn tih sawiin MPCC President chuan, "September 2045 aṭang hian sorkarin OPS hnuaia mi pension pêk tur a nei lo nghal chiah bawk ang," a ti a, pension chhuak thar pêk tur awm lo mah se, mi 40,000 vel bawr chu kum 25-30 chhung vel chu monthly pension/family pension pek zui a la ngaih tur thu a sawi.

Lalsawta chuan sorkar hnathawk nghet zawng zawngte NPS an nih vek hunah chuan tuna new monthly matching contribution cheng vbc. 4.5 vel chu cheng vbc. 45 a tling daih thei dawn tih sawiin, "Kum khat chhung phei chuan cheng vbc. 540 a tling thei dawn a ni. Chutiang a nih chuan OPS leh NPS-a sorkar sum sên tur chu rei tak a la sáng chho hle reng dawn a ni," a ti.

MPCC President sawi danin, Mizoram sorkarin NPS a hman reng avanga sum kawng hniha a hman reng loh hun tûr chu OPS hnuaia pensioner leh family pensioner an awm miah loh hun chauh a ni dawn a, kum 50 vel zet a la ni dawn a ni. Chuvangin sorkar tan hian OPS hi hmang leh vek se, a zangkhai thlak theih hmel zawk a ni.