KHAWTHLIR

Thisen pe

Mizoram UPC hnuaia ṭhalai pawl, Pentecostal Youth Department, Kolasib district chuan nimin khan UPC (Mizoram) Kolasib Venglai Kohhran Sunday School Hall-ah thisen pek an huaihawt a, Kolasib District Hospital tan mi 78-in thisen an pe a, petute mipa 54 leh hmeichhia 24 an ni.

Heroin man

Excise & Narcotics department (END) chuan nimin khan Serchhip Bazar Vengah heroin gram 69.960 leh a neitu nia puh Lalrinzuala (32) s/o Nohleithanga, Khawmawi, Myanmar-a khawsa nia inchhal an man. END vêk hian March 14, Thawhlehni khan Champhai district leh Bulfek, Myanmar khaw inkar kawngah heroin gram 123.270 leh a neitu nia puh Robert Thangsumlanga (24) s/o Simon Thangdoliana, Champhai Vengthar an man bawk.

Thilpek hlan

Excise & Narcotics department, Aizawl district chuan nimin khan Excise & Narcotics Rising Day denchhenin zu leh ruihhloa talbuai, enkawl ngaite enkawl ṭhinna - Ṭawngtai Bethel Camping Centre, Sakawrtuichhun leh OKM Home, Phunchawng-ah alu, buhfai, dal, purun leh tél an hlan.

Kawng khar dawn

Dinthar Thlanmual aṭanga Kanan Road chu PWD, Aizawl Road South Division-in vawiinah siamṭhat hna an thawk dawn a, helai kawng hi khar tur a nih thu Traffic SP Rodingliana Chawngthu in a tarlang.

Palzut chin neih tum

PC party OB meeting nimin khan neih a ni a, an president Vanlalruata chuan, "PC party-in ram hruaina kawnga kan hmalakna turah ram leh mipuite tana ṭha zawk leh mil turin dan (law) palzût chin kan nei dawn a ni. Sorkar laipuiin rampum behchhana dan a siamte hi kan ram, hnam leh sakhaw tana himna ti derthawng thei thil a awm a nih phawt chuan palzut chin emaw, a ram leh mipuite duhdan mila siamrem a ennawn a ni ang," a ti.