AIIMS-ah ZMC let tura hmalakna awm lo

Parliament Budget Session neih mekah nimin khan Rajya Sabha MP K Vanlalvena zawhna pahnih chhàn a ni.

Union Health and Family Welfare minister Dr Bharati Pravin Pawar chuan ZMC chungchanga K Vanlalvena zawhna chhangin, tun dinhmunah ZMC chu AIIMS-ah let tura hmalakna a awm rih loh thu a tarlang a ni.

K Vanlalvena zawhna chhangin, Ministry of Road Transport and Higways minister Nitin Jairam Gadkari chuan Mizoramah national highway puan thar pahnih a awm tih a tarlang bawk.

Nitin Gadkari tarlan danin, Mizorama NH thar pahnih chu Assam rama Jorbat aṭanga inṭan, Aizawl paltlanga Champhai district-a Zokhawthara tawpta NH-6 leh chumi pêng pakhat Bairabi - Mamit te; NH-502(A) Lawngtlai - Paletwa kawngpui aṭanga pêng, Zorinpui-Hmawngbu- Lawngmasute a ni.

Bairabi - Mamit inkar kawng thlûr hnih (double lane) laih a nih dawn leh dawn loh K Vanlalvena zawhna chhangin Union Minister chuan, "Mizoram PWD-ten hemi atan hian DPR an siam mek a, DPR zawh a nih hunah hnathawh ṭan a ni ang," a ti.