World Consumer Rights Day hmang

Nimin kha consumer-te dikna leh chanvo inzirtir tharna ní, 'World Consumer Rights Day' a ni a, Aizawl leh district hrang hrangah hman a ni. Kumina Day thupui chu ‘Empowering Consumers Through Clean Energy Transitions’ tih a ni.

Aizawlah chuan Mizoram Consumers Union (MCU) buatsaihin Central YMA Hall-ah hman niin, Food, Civil Supplies & Consumers Affairs (FCSCA) minister K Lalrinliana'n a hmanpui a, thu sawiin, "Consumer-te'n awlsam zawka lungawi lohna (complaint) an thehluh theihna turin online application - eDaakhil chu kum 2022-ah hawn ni tawh mahse hmangtu an la tlem hle," a ti a, uar zawka hmang turin mipui a sawm.

K Lalrinliana chuan, mipuite chu consumer an nih ang takin an dikna chanvo leh hamṭhatnate an ngaih pawimawh a ṭul thu a sawi a, "India sorkar pawhin consumer-te hamṭhatna ngaihtuahin kum 2019 khan Consumer Protection Act a lo siam tawh. Sumdawngte leh anmahni dawrtu mipui inkarah thawhhona ṭha a ṭul a, mipuite an thil lei kawngah an fimkhur zual a ngai. Thil man zat (MRP), a siamni leh thih ni, cash memo leh receipt lâk thu-ah pawh ṭan lak thar a ngai a, sumdawngte pawhin diktak leh hlemhletna tel loa thil an hralh a pawimawh," a ti a, consumer-te harsatna sukiang turin Consumer Redressal Commission a awm thu leh Consumers Union-te pawh mipuite harsatna sukiang tura ṭan la thar leh turin a chah.

Mizoram sorkarin chak zawka consumer-te dikna chanvo vawnghim turin hma a la mek nia sawiin FCSCA Minister chuan, "District Legal Metrology-te thuamchak zel niin, working standard lab. awm lohna district-ah pawh dahfel thuai a ni dawn," a ti. Environmet tana him lo tuialhthei hman tlem a, thahrui chakna thianghlim zawk nizung chakna (solar energy) leh thli aṭanga chakna (wind energy) hman uar a pawimawh thu a sawi bawk.

World Consumer Rights Day hi kum 1983 aṭang khan kum tin March ni 15-ah thupui thlan bik neia hman ṭhin a ni.

Champhai

Champhai DCSO buatsaihin IPR Auditorium-ah World Consumer Rights Day 2023 hman a ni a; online hmanga thil chah delivery charge pek vek tawh, a chahtu lâk ngai tlat ṭhin te, lirthei chuàn man bituk aia tam lâk te, MRP aia toa thil inleitir leh vuivaina dangte District Commission-ah a ṭul anga hmalak sak tura thlen theih reng a nih thu tarlan a ni.

He hunah hian DCSO CC Sakhawliana, DUDO R Lalnunkimi, Champhai Consumer Association secretary C Zaihmingthanga leh SDC Esther Leihangte'n thupui thlan bik hmangin thil pawimawh hrang hrang an sawi.

Serchhip

Serchhipah chuan DC conference hall-ah bawrhsap Nazuk Kumar hoin World Consumer Rights Day hman a ni a; thupui hrang hrang hmangin mithiamte'n thu an sawi.

Bawrhsap Nazuk Kumar chuan, thil zawrhna hmun leh zawrh dan phungte a inthlak chak tih a sawi a, "Bungrua leh hmanrua pawh a thar ṭha zawk a pung zel a, sum leh paia inbumna pawh a pung zel. Heng thil zawrh leitute hian online emaw, offline emaw hmanga kan lei chuan dan hnuaiah engkim fel leh dik takin kan lei tur a ni," a ti.

Lawngtlai

Lawngtlai DC conference hall-ah World Consumer Rights Day hman a ni a, additional DC Abra-ham Beirazi Khithie in a hmanpui.

Abraham Beirazi Khithie chuan, India ramin The Consumer Protection Act, 2019 (CPA) ṭha tak a neih thu a sawi a, "Lawngtlai district-ah consumer-te'n an chanvo palzutsak an nihin a thlenna tur dika thlen loa ngawih bopui mai a la tam. Consumer-te'n an chanvo dik an chan theih nan huaisen a ngai a, huaisen tur chuan dan hriat a ngai," a ti a, mipuite chu CPA 2019 leh an dikna chanvote hre chiang tura zir peih tur leh, a ṭul hunah huaisen taka ding ngam turin a chah.

Mamit

Mamit district Mizoram Consumer Union buatsaihin DC conference hall-ah World Consumer Rights Day hman a ni a, bawrhsap Lalnunhlua'n hmanpuiin, leilung tichhe thei thilte chu hmang fimkhur turin kalkhawmte a chah.

Lalnunhlua chuan, consumer tih chuan mi tin a huap tih sawiin, "Kan dikna chanvote uluk lehzuala belchiangin, a hre ve lo midangte hrilh chhawng zel ang che u. Kan sik leh sa lo danglam zelah consumer kan nih angin mawhphurhna hrang hrang kan neihte kan hriat tel a pawimawh a, kan chenna leilung tichhe thei thilte kan hman fimkhur a ṭul," a ti.

Khawzawl

Khawzawlah chuan DC conference hall-ah additional DC Lalvenhima hoin World Consumer Rights Day hman a ni.

Lalvenhima chuan, mipuite'n an dikna leh chanvo an hriatchian a ngai tih a sawi a, "Consumer-te vuivaina leh lungawi lohna thlenna tura district tina din District Consumer Redressal Commission hman ṭangkai a ṭul. Tun dinhmunah case lian tham kan nei lo hi lawmawm tih tur nge, hmalakna tur tih pawh ngaihtuah tham a ni," a ti.

He hunah hian thupui thlan bik hmangin mithiamte'n thu an sawi a ni.