National Education Policy, 2020 zirhona Mizoram University-ah Larsapin a hawng

Governor Dr Hari Babu Kambhampati chuan nimin khan Mizoram University-a Education department conference hall-ah 'National Seminar on National Education Policy (NEP)-2020 Philosophy: Indian Philosophical Thoughts and Contribution of Thinkers to the Field of Education' a hawng.

Seminar hi Indian Council of Social Science Research (ICSSR) in Azadi Ka Amrit Mahotsav (AKAM) hmalakna kalzel hnuaia an rawn chhawp chhuah, MZU Education department-in an huaihawt a ni.

Governor Hari Babu Kambhampati chuan, NEP, 2020 chu India ramin education policy a neih tawh zinga belhchian dawl ber a nih thu a sawi a, "A ram mipuite mamawh leh mila duan a ni. NEP 2020 hian zirlaite chu khawtlanga an chhungkaw dinhmun emaw, sum leh pai thua an chhungkaw dinhmun emawa thliar hranna awm miah loin zirna ṭha zawk, intluk tlanna leh remchanna ang khat a chhawp chhuahsak dawn a ni," a ti.

NEP hian multidisciplinary education, research leh innovation lamte a dah pawimawh bik dawn tih sawiin Larsap chuan, "Hemi avang hian India ramin nakin lawkah khawvel thluak bur (global knowledge super power) nih a tumna pawh a hlen theih a beiseiawm hle. NEP 2020 hi document satliah a ni loa, he policy hian tihhlawhtlin tur kawng hrang hrangah hun tiam neiin a chhawp ṭeuh a, hei vang hian NEP 2020 kalpui hi thil awlsam a ni lo tih a hriat," a ti a, zirtirtute inpekna, taimakna, ṭhahnemngaihna leh remhriatnaah NEP 2020 tihhlawhtlina chu a innghat nasa leh zual niin a sawi.

Seminar-ah hian thupui hrang hrang zirho a ni dawn a, vawiin leh naktukah chhunzawm a ni ang.