Lalṭanpuii hnenah National Merit Certificate award hlan

Commerce & Industries minister Dr R Lalthangliana chuan nimin khan Zozia Silk & Handloom neitu Lalṭanpuii hnenah silk puanchei tah kawnga a thiamna leh hnathawh ṭhat avangin National Merit Certificate award a hlan.

Sorkar thuchhuah tarlan danin, Lalṭanpuii hian kum 2018 khan Ministry of Textiles hnuaia Development Commissioner for Handloom (DC Handloom) hnen aṭangin National Merit Certificate award hi a dawng a, hripui leng avangin kuminah a dawng kim thei ta chauh a ni. Mizo zinga handloom lama national award dawng thei pahnihna a ni a, award hian certificate leh Rs 75,000 a keng tel.

Award hlanna inkhawm hi Sericulture conference hall-ah neih a ni a; khuallian Dr R Lalthangliana chuan, Lalṭanpuii’n rampum huap chawimawina a dawng thei chu lawmawm a tih thu leh a lawmpui thu sawiin, "Lalṭanpuii inzir zel peihna leh taimakna hi a entawntlak tak zet a, a hlawhtlinna hian midangte a fuih phur ka beisei," a ti.

Dr R Lalthangliana chuan tihtakzeta an beih chuan Mizote chu thil thiam chak tak an nih thu a sawi a, "International market thleng phak turin ngaihtuahna seng zui zel ang che u. Vawiina kalphung aia changkang leh ṭha zawka kal theih tum ula, khawvel changkanna ang zelin inher rem tum ang che u," a ti a, daihrei leh teirei peih zel turin a kalkhawmte a chah.

He hunah hian Sericulture minister Lalrinawma, Sericulture director V Zothansanga, jt. director Lalrinawma leh Sericulture scientist Dr Lalthlamuana Pachuaute pawhin thu an sawi.